حەلیمە عەبدوڵڵا ئەحمەد ناسراو بە دایە حەلیمە، لە ساڵی 1937 لە گوندی پیستەگیری سەر بە ناوچەی زاویتە لە پارێزگای دهۆک لەدایک بووە. هاوسەرەکەی فەرماندە عەبدولهادی محمد سەعدۆ، فەرماندەی کەتیبەی 4 محمد حەسەن باجیلوری بوو. عەبدولهادی ساڵی 1975 لە شاخەکانی پشت دهۆک شەهید بوو، دایە حەلیمە لەگەڵ شەش کوڕ و چوار کچەکەی لە گوندەکەی خۆی ماوەتەوە و یەکێکە لەو ژنە خۆنەویست و قارەمانانەی کە هاوسەر و چوار کوڕەکەی لە ڕێگای ئازادی کوردستان شەهید بوون. لە ٢٩ی نیسانی ١٩٩٧ کۆچی دوایی کرد.
دوای ڕووخانی شای ئێران، زۆرێک لە چەکدارانی پێشمەرگە ڕوویان لە باشووری کوردستان کرد و ماڵی دایە حەلیمەش بوو بە پەناگە بۆ هێزی پێشمەرگە. لە سەرەتای ساڵی 1982 یەکێک لە کوڕەکانی بە ناوی ئەیوب دەبێتە پێشمەرگە و لە 10ی شوباتی ساڵی 1982 لە گوندی گەڤەرکێ شەهید دەبێت، دوای ئەویش کوڕێکی دیکە بە ناوی ئیسماعیل دەبێتە پێشمەرگە و لە 29ی ئەیلولی ساڵی 1984 لە چیای کەمێکە لە نزیک گوندی بابۆکسێ شەهید دەبێت و تەرمەکەی لەلایەن عێراقییەکانەوە گیراوە هێزی سەربازی. کوڕی سێیەمی دایکە حەلیمە بە ناوی سەڵاح دوای شەهیدبوونی براکانی بووەتە پێشمەرگە و لە ٢٠ی تەمووزی ساڵی ١٩٨٦ لە ئاکرێ شەهید دەبێت، دوای شەهیدبوونی براکانی، کوڕی چوارەمی حەلیمە بە ناوی میحمەد ناسراو بە هێمۆ، پەیوەندی بە هێزی پێشمەرگەوە کردووە و لە ١٩ی نیسانی ١٩٨٧ لەسەر جادەی سەرەکی شەهید دەبێت لە نێوان دهۆک و ئامێدییە.
ماڵی دایە حەلیمە هەمیشە وەک بنکەیەک بۆ هێزی پێشمەرگە لە ناوچەکەدا سەیر کراوە و لەلایەن خەڵکەوە بە ڕێز و خۆشەویستییەوە مامەڵەی لەگەڵ کراوە. ساڵی 1985 ڕووی کردە ناوچە ئازادکراوەکان و لە گوندەکانی بادێ و بۆتیە لە زاویتێ و خازیاوا نیشتەجێ بوو. ساڵی 1988 دوای هێرشی ئەنفال و چەکی کیمیاوی ڕژێمی عێراق بۆ سەر ناوچەکە، خۆی و منداڵەکانی هەوڵیاندا بچنە باکوری کوردستان، بەڵام لەلایەن سوپای عێراقەوە ڕێگرییان لێکرا و ناچاربوون بگەڕێنەوە و بۆ ماوەیەک لە دارستانێکدا خۆیان حەشاردا. پاشان لە لایەن ڕێژیمەوە دەستبەسەر کران و بۆ ماوەی ١٤ ڕۆژ لە زیندان ڕاگیران و بە هۆی ناڕەزایەتی خەڵکی ناوچەکە ئازاد کران.
ساڵی 1991 یەکێک بوو لە پێشەنگەکانی ڕاپەڕینی خەڵکی کوردستان. لە 16ی ئابی 1996 بە بۆنەی یۆبیلی زێڕینی پارتی دیموکراتی کوردستان، مەدالیای بارزانی پێبەخشرا.
سەرچاوە:
ئەرشیفی کۆمیتەی ئینسایکلۆپیدیای پارتی دیموکراتی کوردستان.
