Silêman Îsmaîl Cihangîr, di sala 1927 li gundê Botiya ya li parêzgeha Dihokê ji dayik bûye. Di sala 1959 peywendiyê bi rêzên Partiya Dêmokrata Kurdistanê re kiriye. Di sala 1961 li tixûbê lîjneya navçeya Dihokê li leqa Yek (1) bûye kadîr. Di sala 1967 pileya Serqolî ya Pêşmergeyên Lîjneya Navçeya Dihokê wergirtiye. Di sala 1975 piştî şikesta şoreşa Eylûlê vegeriyaye gundê xwe û ji aliyê rejîma Iraqê ve ji bo bajarê Dîwaniye ya li Başûrê Iraqê hatiye dûrxistin. Di sala 1977 vegeriyaye nav rêzên şoreşê û heta salekê li lîjneya navçeya Dihokê kadîr bûye û paşê bûye Berpirsê Lîjneya Navçeya Amêdiyê.
Di sala 1983 kurekî wî yê bi navê Mecîd Silêman ku berpirsê rêxistina nihênî ya Cudî bû hatiye şehîd kirin. Li meha Eylûla sala 1987 kurekî wî yê dinê bi navê Mihemed Salih Silêman ku berpirsê Lîjneya Navçeya Amêdî yê bû li şerê Kanî Masê ya parêzgeha Dihokê şehîd bû. Di sala 1988 di dema operasyona berfireha Enfalê û kîmyabaran kirina navçeya Behdînanê, kurê sêyemê bi navê Fexrî Silêman ku Pêşmergeyê Lîjneya Navçeya Dihokê bû, bi komek kesên din ve ji aliyê rejîma Iraqê ve hatiye destgîrkirin û paşê jî hatiye şehîd kirin. Li heman salê da Silêman Îsmaîl bi malbata xwe ve ji bo komelgeha Cejnîkan ya li nêzîkî Behirkê ya li parêzgeha Hewlêrê hatiye dûrxistin. Di sala 1990 vegeriyaye parêzgeha Dihokê. Di sala 1991 li serhildan û raperîna xelkê Başûrê Kurdistanê de û bi taybetî li serhildana gundê Malta ya li parêzgeha Dihokê de rolekî xwe yê ber bi çav hebû. Ji ber wê yekê dûbare pileya kadîrê Lîjneya Navçeya Dihokê ya li Leqa Yek (1) wergirtiye. Li kongreya sêzdehem ya Partiya Dêmokrata Kurdistanê ya sala 2010 ji aliyê Serok Mesûd Barzanî ve madalya Barzanî wergirtiye.
Çavkanî:
1. Arşîva Desteya însîklopediya Partiya Dêmokrata Kurdistanê
