Helîme Ebdullah Ehmed, bi navê Dayika Helîme jî tê naskirin, di sala 1937an de li gundê Piştagirî yê ser bi devera Zawîte ya parêzgeha Duhokê ji dayîk bûye, hevjînê wê Fermandar Ebdulhadî Mihemed Saado, serliqê tabûra 4. a Mihemed Hesen Bajilûrî bû, di sala 1975an de Ebdulhadî li çiyayên pişta Duhokê şehîd bû, Dayîka Helîme tevî şeş kur û çar keçên xwe li gundê xwe ma û yek ji wan jinên fedakar û leheng e ku hevjîn û 4 kurên wê di rêya azadiya Kurdistanê de şehîd bûne. Di 29ê Nîsana 1997an de koça dawî kir.
Piştî rûxandina rejîma Şahê Îranê, gelek pêşmerge çûnê Başûrê Kurdistanê, mala Dayîka Helîme bûye penageha hêzên pêşmerge. Di destpêka sala 1982’an de yek ji kurên wê bi navê Eyûb bû pêşmerge û di 10’ê Sibata 1982’an de li gundê Geverkê şehîd bû. Piştî wî kurekî din ê bi navê Îsmaîl bû pêşmerge û di 29ê Îlona 1984an de li Çiyayê Kemeka li nêzîkî gundê Baboxkê şehîd bû û cenazeyê wî kete destê artêşa Iraqê. Sêyemîn kurê Dayîka Helîme bi navê Selah piştî şehîdbûna birayên xwe bû pêşmerge û di 20ê Tîrmeha 1986an de li Akrê şehîd bû. Piştî şehîdbûna birayên xwe, kurê Halîme yê çaremîn bi navê Mihemed ku bi navê Hemo jî tê naskirin, tevlî hêzên Pêşmerge dibe û di 19ê Nîsana 1987an de li ser rêya sereke ya di navbera Duhok û Amêdiyê de şehîd dibe.
Mala Dayîka Helîme hertim weke baregeha hêzên Pêşmerge li herêmê hatiye dîtin û ji aliyê xelkê ve bi rêz û hezkirinê hatiye girtin. Di sala 1985’an de berê xwe dide deverên rizgarkirî û li gundên Badê û Botiya yên Zawîte û Xaziyava bi cih dibe. Di sala 1988’an de piştî Enfal û kîmyabarana rejîma Iraqê li ser deverê, wê û zarokên xwe hewl dan biçin Bakurê Kurdistanê, lê belê ji aliyê artêşa Iraqê ve hat astengkirin û neçar ma ku vegere û demekê li daristanekê xwe veşart, piştre ji aliyê rejîmê ve hatin girtin û 14 rojan di zindanê de man û ji ber nerazîbûnên xelkê deverê hatin berdan.
Di sala 1991 de yek ji pêşengên serhildana gelê Kurdistanê bû, di roja 16ê Tebaxa 1996ê de bi boneya Yobîla Zêrîn ya Partiya Dêmokrata Kurdistanê (PDK) bi medalyaya Barzanî hat xelatkirin.
Çavkanî:
Arşîva Desteya Insîklopediya Partiya Dêmokrat a Kurdistanê.
