ساڵی 1967 پەیوەندی بە هێزی پێشمەرگەی شۆڕشی ئەیلولەوە کردووە و بووەتە پێشمەرگە لە دەڤەری بەلەک. تا ساڵی ١٩٧٠ لەوێ درێژەی بە ئەرکی پێشمەرگەی داوە، لە ساڵی ١٩٧٠ لەگەڵ محمد ئەمین ڕێشکێ لە ئەنجومەنی قەزای بەلەک بووە. دوای ڕێککەوتنی ١١ی ئازاری ١٩٧٠ دەبێتە پاسەوانی سنوور لە ناوچەی ڕێوەندیز. لە ساڵی 1974 و دوای دەستپێکردنی شەڕی نێوان حکومەت و هێزی پێشمەرگەی شۆڕشی ئەیلول، ئەحمەد بیرنۆ گەڕایەوە ناو ڕیزەکانی پێشمەرگەی هێزی کارۆکس کە لەلایەن سەید سەلیمەوە فەرماندەیی دەکرا. پاشان گواستراوەتەوە بۆ قەسر و دەبێتە پاسەوان لە بنکەی بارزانی لە بەردە زەرد نزیک گوندی ڕەیات.

لە ساڵی ١٩٧٦، دوای دەستپێکردنی شۆڕشی گوڵان چووە شاری کەرەج و لەگەڵ ئیدریس بارزانی کۆبووەوە. پاشان لەگەڵ عارف ئەحمەد و محمد ڕەواندزی و مستەفا ئەلیاس پەیوەندی بە هێزی پێشمەرگەوە بە فەرماندەیی ژەنەڕاڵ یونس ڕۆژبەیانی و حەمید ئەفەندی لە ناوچەی سیدەکان کرد. لەگەڵ حەمید ئەفەندی لە بنکەی گەلیێ گۆستا لە پشت دەشتی بێرازگر لە قەزای سیدێکان لە سنووری پارێزگای هەولێر کۆبووەوە. پاشان، بنکەکەیان گواسترایەوە بۆ بێرکیم لە ناوچەی سیدەکان.

لە ساڵی ١٩٩١ دوای ڕاپەڕینی خەڵکی باشووری کوردستان، ئەحمەد بیرنۆ لە ناوچەی سیدەکان بوو. پاشان لەگەڵ حەمید ئەفەندی و نیهاد بارزانی بنکەکەی گواستەوە بۆ ناحیەی پەیمان لە پیرمام. لەوێشەوە گواستراوەتەوە بۆ یەکەی فەرماندەیی 43ی هەڵگورد لە سۆران.

ئەحمەد بیرنۆ لە ماوەی ژیانی پێشمەرگەدا بەشداری چەندین شەڕی کردووە. وەک شەڕی کۆڕەک و شەڕی سێرچیا و شەڕی چیای پیران و شەڕی سیدەکان و شەڕی شواکورک لە ساڵی ١٩٨٨ و جارێکیش بریندار بووە. لە ٢٨ی ئایاری ٢٠١٣ لەلایەن سەرۆک بارزانیەوە مەدالیای بارزانی پێبەخشرا. ڕۆژی 3ی ئابی 2019 بەهۆی نەخۆشیەوە کۆچی دوایی کرد و لە گۆڕستانی دیانا بەخاک سپێردرا.

سەرچاوە:

1. ئەرشیفی بۆرد منئینسایکلۆپیدیای پارتی دیموکراتی کوردستان.