سێگڤان عوسمان هەڵۆ ناسراو بە (سێگڤان هەڵۆ)، لە 1ی تەمموزی ساڵی 1968 لە گوندی بۆسێل، سەر بە قەزای زاخۆ سەر بە پارێزگای دهۆک لە دایکبووە. لە ساڵی 2008 بڕوانامەی بەکالۆریۆسی لە کۆلێژی یاسای زانکۆی سەلاحەدین وەرگرتووە و لە ساڵی 2016 بڕوانامەی ماستەری لە بواری یاسا لە کۆلێژی یاسای زانکۆی سەلاحەدین وەرگرتووە، لە 9ی تشرینی دووەمی ساڵی 1984 کۆچی کردووە بۆ ئێران و لە شاری نەخێدە نیشتەجێ بووە. ساڵی 1991 گەڕایەوە باشووری کوردستان.
لە 12ی کانونی یەکەمی ساڵی 1983 پەیوەندی بە ڕێکخراوەکانی حیزبی دێموکراتی کوردستانەوە کردووە، لە 25ی تشرینی دووەمی 1984دا بووەتە پێشمەرگە لە بەشی دارایی قوتابخانەی سیاسی، لە ساڵی 1985 بووە بە کادری بەشی دارایی قوتابخانەی سیاسی لە ڕەجان، لە ساڵی 1991 بووەتە ئەندامی بەش لە بەشی دارایی قوتابخانەی سیاسی لە شاری ڕەوەندیز، و لە ساڵی ١٩٩٣ بووەتە ئەندامی قوتابخانە لە بەشی دارایی قوتابخانەی سیاسی.
ڕۆژی ٦ی تشرینی دووەمی ٢٠٢٢ لە کۆنگرەی چواردەهەمی پارتی دیموکراتی کوردستان لە شاری دهۆک، لە لایەن ئەندامانی کۆنگرە بە ئەندامی کۆمیتەی ناوەندی هەڵبژێردرا.
سەرچاوە:
1. ئەرشیفی کۆمیتەی ئینسایکلۆپیدیای پارتی دیموکراتی کوردستان.
