ئومێد سەباح عوسمان لە ساڵی 1980 لە شاری کەرکوک لەدایک بووە، خوێندنی سەرەتایی و ناوەندی و ئامادەیی لە کەرکوک تەواوکردووە، بڕوانامەی یاسایی لە زانکۆی کەرکوک وەرگرتووە، بڕوانامەی ماستەر لە یاسای ئەهلی لە زانکۆی سەلاحەدین و دکتۆرای لە یاسای تایبەت لە زانکۆی سلێمانی وەرگرتووە.
لە ساڵی 2004 تا 2012 لە وەزارەتی خوێندنی باڵا و توێژینەوەی زانستی حکومەتی هەرێمی کوردستان کاری کردووە، لە نێوان ساڵانی 2012 بۆ 2017 وتەبێژی فەرمی سەرۆکایەتی هەرێمی کوردستان بووە، لە مانگی تەمموزی 2019ەوە بەرپرسی دیوانی ئەنجومەنی وەزیرانی کابینەی نۆیەمی حکومەتی هەرێمی کوردستان بووە.
لە کۆنگرەی ١٤ی پارتی دیموکراتی کوردستان لە ٦ی تشرینی یەکەمی ٢٠٢٢ لە دهۆک بە ئەندامی کۆمیتەی ناوەندی پارتی دیموکراتی کوردستان هەڵبژێردرا.
سەرچاوە:
1. ئەرشیفی ئینسایکلۆپیدیای حیزبی دێموکرات
