ئەکادیمیست و سیاسەتمەدار مەسرور مەسعوود مستەفا بارزانی ناسراو بە مەسرور بارزانی، لە ساڵی ١٩٨٥ پەیوەندی بە ڕیزەکانی پێشمەرگەی کوردستانەوە کردووە، وەک ئەندامی کۆمیتەی ناوەندی و ئەنجومەنی سەرکردایەتی هەڵبژێردرا و دواتر وەک ئەندامی مەکتەبی سیاسی پارتی دیموکراتی کوردستان لە کۆنگرەی ١٢ لە ساڵی ١٩٩٩ و لە کۆنگرەی ١٣ لە ساڵی ٢٠١٠، و بووە لە ساڵی 2022 لە کۆنگرەی 14ی پارتی دیموکراتی کوردستان وەک جێگری سەرۆکی پارتی دیموکراتی کوردستان هەڵبژێردرا، لە ساڵی 2004 بووەتە بەرپرسی دەزگای پاراستنی هەرێمی کوردستان و لە ساڵی 2012 وەک ڕاوێژکاری ئەنجوومەنی ئاسایشی هەرێمی کوردستان دەستنیشان کراوە. ساڵی 2019 بوو بە سەرۆکی حکومەتی هەرێمی کوردستان و ئەرکی پێکهێنانی کابینەی نۆیەمی پێسپێردرا.
ژیاننامە
مەسرور بارزانی لە ٢ی ئازاری ١٩٦٩ لە گوندی دلمان سەر بە دەڤەری باڵەکایەتی لە دایکبووە. لە بنەماڵەی شێخ تەکیەی بارزانییە. خوێندنی ناوەندی لە کۆماری ئیسلامی ئێران تەواو کردووە. ساڵی 1993 بۆ درێژەدان بە خوێندن چووەتە ئەمریکا و لە ساڵی 1997 بڕوانامەی بەکالۆریۆسی لە پەیوەندییە نێودەوڵەتییەکان لە زانکۆی واشنتۆن لە ئەمریکا وەرگرتووە. پاشان لە هەمان زانکۆ درێژە بە خوێندن دەدات و بڕوانامەی ماستەری لە ئاشتی و چارەسەرکردنی ململانێکان وەرگرتووە. خێزاندارە و خاوەنی سێ کوڕ و کچێکە بە ناوەکانی یاسمین و ئارین و بێرزین و ئاران. زمانی کوردی، فارسی، ئینگلیزی و عەرەبی قسە دەکات.
لاپەڕەی کار
مەسرور بارزانی لە هاوینی ساڵی 1985 پەیوەندی بە هێزی پێشمەرگەی کوردستانەوە کرد و وەک پێشمەرگە لە ڕیزەکانی شۆڕشی پێشکەوتنخوازی گوڵاندا بەشداری کرد. لە ساڵی ١٩٨٨ بەشداری لە داستانی خێوکورکێ کردووە و زۆربەی شەڕەکانی بە کامێراکەی تۆمار کردووە. ساڵی 1991 وەک پێشمەرگە بەشداری ڕاپەڕینی کوردستانی کردووە و لە هەمان ساڵدا بەشداری لە خولی نۆیەمی کۆنفرانسی کادیرانی پارتی دیموکراتی کوردستان کردووە.
لە کۆنگرەی دەیەمین ساڵی 1989، لە کۆنگرەی دوازدەهەم لە ساڵی 1999، لە کۆنگرەی 13 لە ساڵی 2010 وەک نوێنەر بەشداری کردووە، لە کۆنگرەی 12 و 13 بە ئەندامی کۆمیتەی ناوەندی و ئەنجومەنی سەرکردایەتی هەڵبژێردراوە، دواتریش وەک ئەندامی مەکتەبی سیاسی پارتی دیموکراتی کوردستان. لە کۆنگرەی ١٤ی ساڵی ٢٠٢٢ بە کۆی دەنگ لەلایەن نوێنەرانی کۆنگرە بە جێگری سەرۆکی پارتی دیموکراتی کوردستان هەڵبژێردرا.
ئەرک و بەرپرسیارێتی
لە ساڵی 1998 لە ئەمریکاوە بۆ خزمەتکردن گەڕاوەتەوە کوردستان و لە 20ی تشرینی دووەمی 2004 بووەتە سەرۆکی دەزگای پاراستنی هەرێمی کوردستان.
ساڵی 2004 یەکێک بووە لە ڕاوێژکارانی سەرۆک مەسعوود بارزانی بۆ نووسینی دەستووری کۆماری فیدراڵی عێراق و لە ساڵی 2005 لەلایەن پارتی دیموکراتی کوردستانەوە وەکو کەسی بەرپرس لە یەکخستنی حکومەتی هەرێمی کوردستان و ئیدارەی سلێمانی دەستنیشانکراوە. ڕۆژی 30ی نیسانی 2012 بە بڕیاری ژمارە 68ی سەرۆکایەتی هەرێمی کوردستان، وەک ڕاوێژکاری ئەنجوومەنی ئاسایشی هەرێمی کوردستان دەستنیشانکرا، لە ساڵی 2017یشدا بەشێوەیەکی کارا بەشداری پڕۆسەی ڕیفراندۆمی سەربەخۆیی کوردستانی کرد.
ڕۆژی 3ی کانونی یەکەمی 2018، لە کۆبوونەوەی ئەنجومەنی سەرکردایەتی پارتی دیموکراتی کوردستان، وەک کاندیدی حزبەکە بۆ پۆستی سەرۆکی حکومەتی هەرێمی کوردستان کاندیدکرا، ڕۆژی سێشەممە 11ی حوزەیرانی 2019، لەلایەن ئەندامانی پەرلەمانی کوردستانەوە بە 87 دەنگ لە کۆی 97 دەنگ بە سەرۆک وەزیرانی هەرێمی کوردستان هەڵبژێردرا.
ڕۆژی 12ی حوزەیرانی 2019، بە فەرمانی هەرێمی ژمارە 1، نێچیرڤان بارزانی، سەرۆکی هەرێمی کوردستان دەسەڵاتی پێکهێنانی کابینەی نۆیەمی حکومەتی هەرێمی کوردستانی پێدرا، ڕۆژی چوارشەممە 10ی تەمموزی 2019، متمانەی سەرۆکایەتیی خولی پێنجەمی ئەنجومەنی وەزیرانی کوردستانی بۆ کابینەی نۆیەمی حکومەتی هەرێمی کوردستان لە پەرلەمانی کوردستان وەرگرت.
شەڕی تیرۆریستانی داعش
دوای مانگی ئابی 2014، لە بەرامبەر هێرشەکانی تیرۆریستانی داعش بۆ سەر هەرێمی کوردستان، مەسرور بارزانی، ڕاوێژکاری ئەنجوومەنی ئاسایشی هەرێمی کوردستان، ژوورێکی ئۆپەراسیۆنی هاوبەشی لەگەڵ هاوپەیمانی نێودەوڵەتی دامەزراند و ڕۆڵێکی کاریگەری هەبوو لە ئاراستەکردنی هێرشە ئاسمانییەکان و ئەنجامدانی ئۆپەراسیۆنی مەیدانی دژی تیرۆریستان. لە بەرەکانی شەڕدا شانبەشانی سەرۆک مەسعود بارزانی ئامادەبووە و بەشداری لە سەرپەرشتیکردنی زۆربەی ئۆپەراسیۆنەکانی دژی داعشدا کردووە.
لە 20ی کانونی یەکەمی 2014 بەشداری ئۆپەراسیۆنی ڕزگارکردنی دەشتی ڕێبیا و چیای شنگال و لە 13ی تشرینی دووەمی 2015 بەشداری ئۆپەراسیۆنی ڕزگارکردنی شاری شنگال لە دەستی چەتەکانی داعش کرد.
چالاکی خێرخوازی و ئەکادیمی
لە دامەزراندنی سەنتەری مستەفا بارزانی بۆ ئاشتی کورد لە زانکۆی ئەمریکی لە واشنتۆن بە شێوەیەکی کارا بەشداری کرد و لە ٢٤ی حوزەیرانی ١٩٩٩ لە کاتی کردنەوەی ناوەندەکەدا وتارەکەی سەرۆک مەسعوود بارزانی خوێندەوە. لە ١٧ی نیسانی ٢٠٠٠ بەشداری لە کۆنگرەی جیهانی گەڕانی کورد و ناسنامە لە ناوەندی مستەفا بارزانی کردووە.
ساڵی 2005 دەزگای خێرخوازیی بارزانی دامەزراند، کە ڕێکخراوێکی خێرخوازییە و تایبەتە بە هاوکاریکردنی ئاوارەکان و خەڵکی ناوچەکە کە پێویستیان پێیەتی. لە مانگی کانوونی دووەمی ساڵی ٢٠١٣ بەردی بناغەی زانکۆی ئەمریکی لە دهۆک دانا و لە ئێستادا سەرۆکی فەخری دەستەی ئەو زانکۆیە.
ساڵی ٢٠١٤ کۆمیتەی ئینسایکلۆپیدیای پارتی دیموکراتی کوردستان بۆ ناساندن و کۆکردنەوە و بەڵگەنامە و بڵاوکردنەوەی مێژووی سەروەری کار و خەباتی حیزبی دێموکراتی کوردستان دامەزرا.
سەرچاوە: .
ئەرشیفی کۆمیتەی ئینسایکلۆپیدیای پارتی دیموکراتی کوردستان.
