Di şeva 11-12ê Mijdara 1986an de artêşa Iraqê bi piştevaniya top û balefirên şer êrişî navçeyên derdora Zaxoyê kir, ku baregeha Komîteya navçeya Zaxo ya Partiya Demokrata Kurdistanê (PDK) lê bû, operasyona leşkerî ya artêşê û hêzên çekdar ên hikûmetê bilindahiyên Dilayê girtin, di encamê de peywendiya di navbera Komîteya navçeya Zaxo û Hêzên Pêşmerge yên wê herêmê bi herêmên din re qut bû, jibo gihandina vî nûçey Komîteya navçeya Duhokê pêwendî bi serkirdayetiya şoreşê re kir û da zanîn ku şerekî giran li sînorê her du navçeyên Duhok û Zaxo de heye, balefirên şer bi tundî çeperên Pêşmerge bombebaran dikirin, di encama êrîşên balefiran de li gundê Kanî Pûngê extiyarekî bi navê Hacî Nebî Şehîd bû û 4 jin û zarok jî birîndar bûn, herwiha li gundê Zêwê nêzîkî baregeha liqa yekem a Partiya Demokrat a Kurdistanê êrîşên balefiran dewam kirin, li wir jî extiyarekî din şehîd ket. [1]
Diyare armanca hikûmeta Iraqê ji êrîşên ser baregeh û çeperên Pêşmerge yên li herêma Behdînan, ji bo bitepisandina dengê şoreşê bû li hemberî êrîşên berdewam ên pertîzanî ên li dijî hêzên dewletê yên li qadên cuda, ji êrîşên ser baregehên leşkerî û danîna kemînên li ser rêyan, bê guman ev yek ji aliyekê ve bû sedema ziyanên giran ji bo hêzên artêşa Iraqê, ji aliyê din ve jî hikûmet xistibû rewşeke metirsîdar ku her tim ne rehet be. [2] Ji ber ku liq, komîteyên navçeyan, rêxistin û hêzên pêşmerge li ser herêman bi awayekî hatibûn dabeşkirin, ku her yek ji wan di çarçoveya desthilata xwe de çalak bûn. [3]
Êrîşên artêş û hêzên çekdar ên hikûmetê li ser baregeh û çeperên Pêşmerge dema çend rojan li sînorê herdu herêmên Duhok û Zaxoyê berdewam bûn, di 13’ê Cotmeha 1986’an de navçeya Dihokê pêwendî bi serkirdayetiya şoreşê re kir û da zanîn ku fişar û êrîşên giran ên hikûmetê gihiştiye ser navçeya Zaxoyê û dest daniye ser bregehê komîteya navçeyê û bomberana balefiran li ser herêmê berdewam dike, hêjayî gotinê ye ku parastina hêzên pêşmerge û çeperên wan li pêşberî hêzên hikûmetê, bi taybetî çeteyên (Caş) di saet 4.00an a êvara 14ê Cotmeha sala 1986ê de, pêşdeçûn û êrîşên wan têk birin. [4]
Êrîşên artêş û hêzên çekdar ên Iraqê li ser navçeyên şoreşgê nîşan dide ku hikûmetê hertim hewl daye hêza xwe bigihîne hemû navçeyên Kurdistanê, ji bo bêdengkirina şoreşê li hemû herêman û astengkirina çalakiyên wan.
Çavkanî:
-
Mesûd Barzanî, Barzanî û Tevgera Rizgarîxwaz a Kurd, Berg 4, 1975-1990 Şoreşa Gulanê, Beş 2, Çapa Yekem, Çapxaneya Ruxana, 2021.
-
Şimal Zêbarî, Çend rastiyên veşartî di Şoreşa Gulanê de, çapa 1, çapxaneya Rojhelat, Hewlêr – 2015.
-
Hacî Mîrxan Dolemerî, Lêgerîna Dadperweriyê, Berg 1, Çapa Duyem, Kurdistan – 2021.
[1]- Mesûd Barzanî, Barzanî û Tevgera Rizgarîxwaz a Kurd, Berg 4, 1975-1990 Şoreşa Gulanê, Beş 2, Çapa Yekem, Çapxaneya Ruxana, 2021, r 63.
[2]- Şimal Zêbarî, Çend rastiyên veşartî di Şoreşa Gulanê de, çapa 1, çapxaneya Rojhelat, Hewlêr – 2015, r 345.
[3]- Hacî Mîrxan Dolemerî, Lêgerîna Dadperweriyê, Berg 1, Çapa Duyem, Kurdistan – 2021, r 251.
[4]- Mesûd Barzanî, Heman çavkanî, r 64.
