Di sibeha 24ê Nîsana 1974an da artêşa Iraqê li dijî herêmên di bin kontrola şoreşa Kurdistanê da dest bi êrîşan kir û bi hemû hêza xwe derket qada şer û ji bo dagirkirina tevahiya xaka Kurdistanê pêşveçûnên xwe domandin, hinek hêzên wan di 25’ê Nîsana 1974’an de li ser rêya Kerkûk-Silêmaniyê beriya ku bigihêje Çemçemal xwestin biçin Sengaw û dest bi serda bigirin, yekîneyên hêzê pêkhatî bûn ji tabûra 2 ya Hêza 4 a Firqeya 2 ya Kerkûkê bi alîkariya tabûrek tankan ku pêşiya hêzê bin, xuya ye ku artêşa Iraqê hay jê nebû ku pêşmergeyên tabûra 1 a hêza 2 ya Kerkûkê bi qasî ku ji destê wan tê ew ê li ber xwe bidin.
Li devera Şîwe Sûrê Hêzên Pêşmerge di çeperên berevaniyê de cih girtibûn, li pêşiya pêşveçûna hêzên Iraqî astengiyek betonî ya mezin bûn, her wiha mayinên dije tank û dije mirov li ser rêya artêşa êrîşkar bi cih kirbûn, dema şer dest pê kir hinek tankên artêşa Iraqê bi mayînan hatin derbkirin û hatin têkbirin, wê demê fermandarê Tabûra 2an a Piyade Albay Ziyadîn Cemal ferman da ku ji bilî dema pêwîst tank nekevin bereya herî pêş a êrîşê.
Piştî ku hêzên piyade êrîşa xwe berdewam kirin, ji nişka ve rastî gulebarana pêşmergeyan û mayînan hatin, piştî şer û pevçûnên 8 demjimêran ên berdewam, artêşa Iraqê bi berevaniya bihêz a Pêşmerge şikest, ziyanên giran ên canî û madî çêbûn ku bi dehan kuştî û birîndar hebûn, yek ji kuştiyan pasevanê taybet ê fermandarê tabûrê bû, ziyanên madî jî jinavbirina 6 tank, 3 zirx û gelek otomobîlên leşkerî, her wiha gelek çekên biçûk û navîn jî hatin desteserkirin.
Çavkanî:
- Senger Ibrahîm Xoşnaw, Bûyerên Leşkerî yên Şoreşa Îlonê 1970-1975, Çapa 1, Hewlêr, 2022.
- Karwan Jewher Mihemed, Îdrîs Barzanî 1944-1987 Jiyan û Rola wî a Siyasî û Leşkerî di Tevgera Rizgarîxwaza Kurd de, çapxaneya Hêvî, Hewlêr, 2019.
