Piştî têkçûna Şoreşa Îlonê di Adara 1975an de, serkirdayetiya Kurd li ser berdewamiya şoreşê hizir kirî, ku divê bi çalakiyên Pêşmerge vegere qada têkoşînê, tevî ku serkirdayetiya şoreşê ev heyam di koçberiyê û di bin çavdêriya Îranê de derbas kir jî, lê bi her awayî be derfet hate pêş ku şoreş dîsa dest pê bike û hêzên Pêşmerge li navçeyên cuda yên Kurdistanê bi cih bibin, daku ji rejîma Îraqî re bi bêjin ku şoreş berdewam e û berevanîkirina mafên Kurdan zehmet e ku dest jê bê berdan.
Eşkere ye ku têkoşîna şoreşa kurdî vê carê gelek çalakiyên pêşmergeyan li vir û wir xwe dibîne, dûrî şerê eniyê, ku bi her sedemekê be rê nedin rejîma Iraqê aramiyê bibîne û bi aramî bijî, ew bû di nîvê sala 1976’an de şoreşa çekdarî dîsa dest pê kir û careke din hêviyek da gelê Kurdistanê, ev gav di dîroka kurdan de bû qonaxeke dîrokî, bi vê mebestê, Hêzên Pêşmergeyên Kurdistanê di heyama şoreşê de gelek çalakiyên leşkerî li navçeyên cuda pêk anîn û derbeke mezin li yekîneyên leşkerî, ewlekarî û çekdarî ên rêjîma Iraqê xistin.
Çalakiya ku em dixwazin di van çend rêzan de behsa wê bikin, şerê Şeraniş e li ser rêya sereke ya di navbera Şeraniş û deşta Texê de li devera Qela Selmaniyê li devera Sindiyan, diyar e Hêzên Pêşmergeyên Kurdistanê hertim li derfetekê digeriyan ku yekîneyên artêşa Iraqê têk bibe, di sibeha 18ê Tebaxa 1976an de hêzeke artêşa Iraqê ket kemîna hêzên Pêşmerge û di navbera wan de şerekî giran derket, piştî ku şer bi dawî bû Hêzên Pêşmerge ziyanek mezin gihandin artêşa Iraqê, 12 leşker hatin kuştin ku di nav wan de efserekî bi rutbeya Neqîb û yekî din jî bi pileya Milazimê yekem hebûn, her wiha şofêrekî bi rutba Erîf û çend piledarên din jî di nav kuştiyan de hebûn, di destkeftên Pêşmerge de çend çekên kelaşnîkov hebûn.
Her çende çalakiyên bi vî rengî yên pêşmergeyan nakeve nava azadkirina herêmekê ku Pêşmerge dest daniye ser û tê de mane, belê, derbeyek li yekîneyên leşkerî yên artêşê bû di çarçoveya çalakiyên partîzanî yên şoreşê de û moralek ji bo Hêzên Pêşmerge li hember dijmin bû, di heman demê de peyamek bû ji bo rejîma Iraqê ku şoreş berdewame li ser parastina mafên gelê Kurd.
Çavkanî:
-
Xazî Adil Gerdî: Pêşmergeyek di xizmeta Barzanî de, cild 2, çapa duyem, Tirkiye-2021.
-
Mesûd Barzanî: Barzanî û Tevgera Rizgarîxwaz a Kurd, Berg 4, 1975-1990 Şoreşa Gulanê, Beş 2, Çapa Yekem, Çapxaneya Ruksana, 2021.
-
Cemal Fethullah Teyib: Tevgera Rizgarîxwaz a Kurd li Başûrê Kurdistanê 1976-1980, çapa 1, Çapxaneya Şehab, Hewlêr-2012.
