Berdewamiya çalakiyên hêzên Pêşmerge sînorên şer di navbera Hêzên Pêşmerge û artêş û çekdarên rêjîma Be's de berfirehtir kir û piraniya navçeyên cuda li xwe girt, bê guman, hêzên pêşmerge hertim li derfetê gerîyane ku li her quncikekê de derbeyek kujer li hêzên hikûmetê bixin û peyama nerazîbûnê û helwestê li hember binpêkirina mafên Kurdan bigihînin raya giştî, di vê çalakiya hêzên pêşmerge de ku şeva 10/11ê Kanûna duyem a 1988ê pêk hat, êrîşa li dijî Tabûra 6’emîn a Taybet a li Mandîl a 5 kîlometre dûrî Çemçemalê bû.
Êrîşa li dijî hêzên leşkerî yên rejîma Iraqê bi beşdariya Pêşmergeyên Komîteya navçeya Çemçemal, Şiwan, Bazyan, Kelar, rêxistina Rencdaran û hêzeke baregehên liqa sêyemîn a Partiya Dêmokrata Kurdistanê hat kirin. Eşkere ye ku di vê heyamê de hêzên Pêşmerge di çarçoveya rêxistinbûna partiyê de wek liq, navçe û rêxistinan hatine birêxistinkirin, piştî ku nexşe û pilana lidarxistina çalakiyên Pêşmerge li navçeyê hate danîn, piştî bidawîbûna amadekariyan û diyarkirina dema destpêkirinê, êrîşa li ser wê tabûrê dest pê kir. Bi pêngava yekem a Pêşmerge, wan di demeke nêzîk de û di nav çil deqeyan de navenda Tabûrê girti, di encamê de 14 çete û efserekî pilebilind ê leşkerî hatin kuştin û 37 jî dîl hatin girtin, eşkere bû ku di vî şerî de ziyanên hêzên rejîmê gelek bûn û bi qasî ku tê zanîn ev bûn, teqîna embara Tabûrê, şewitandina (40) konên leşkerî, şewitandina (3) tirimbêlên TOYOTA û du tirimbêlên Eva yên leşkerî.
Di vî şerî de, Hêzên Pêşmerge gelek destkeftî bi dest xistin wek desteserkirina (2) tirimpêlên NISSAN, yek TOYOTA CORONA, yek LANDGROUS, tirimpêleke mezin a barkirinê, (4) Kelaşînkov, (6) RPG û (40) guleyên RPG, yek RBK, (2) Amûrên dûrbînê û Amûreke têlefonê.
Di tomarkirina vê dastanê de 4 pêşmerge şehîd bûn, ew jî ev in: Salih Mihemed Star bi nasnav Rêbwar ku pêşmergeyê navenda liqê bû, Rizgar Hemîd pêşmergeyê Komîteya navçeya Çemçemal, Cebar Xefûr bi nasnav Dêwane Pêşmerge yê Komîteya navçeya Şiwan, Salih Mihemed Salih bi nasnav Mam Salih pêşmergeyê Komîteya navçeya Dûz, her wiha 13 pêşmergeyên din jî birîndar bûn.
Bê guman çalakiyên bi vî rengî yên Hêzên Pêşmerge roleke erênî û girîng di bilindkirina morala Pêşmerge û xweşkirina dilê gel de hebû, bi wî awayî ku hêza şoreşê ew qas e ku li her demê û li ku bixwazin dikarin êrîşî hêzên rejîmê bikin, di heman demê de tirs û dilgiraniyek mezin di nav refên hêzên leşkerî de çêkir û neçar man ku ji bo jinavbirina vê tirs û nîgeraniyê dest bi topbaran û bombebarankirina gundên kurdan bikin.
Çavkanî:
-
Mesûd Barzanî: Barzanî û Tevgera Rizgarîxwaz a Kurd, berg 4, 1975-1990 Şoreşa Gulanê, Beş 2, Çapa Yekem, Çapxaneya Ruksana,2021.
-
Xazî Adil Gerdî: Pêşmergeyek di xizmeta Rêya Barzanî de Hecî Bêroxî, berg 2, Çapa Duyem, Tirkiye-2021, r 269.
-
Şîmal Zêbarî: Çend rastiyên veşartî di Şoreşa Gulanê de, çapa yekem, çapxaneya Rojhelat, Hewlêr –2015.
