Şerê Zembîl Firoş jî şerekî din ê di navbera Hêzên Pêşmergeyên Kurdistanê û artêşa rejîma Be's de ye. Di 22ê Adara 1980ê de li devera Batîfa li ser rêyeke sereke, hêzên Pêşmerge kemînek ji bo hêzên artêşa Iraqê danîn, di encamê de hêzên artêşê ketin kemînê û derbeyên giran xwarin. Di vê demê de hêzeke din a Lîwaya Batîfa ya artêşa Iraqê jî ji bo piştgirî û alîkariya hêzên wan ên şikestî gihîşt cihê bûyerê, bi hatina wan re şerekî giran di navbera hêzên Pêşmerge û leşkerên artêşê de derket ku çend demjimêran dom kir. Di encamê de hêzên Pêşmerge hêzên artêşa Iraqê têk birin û bi derbeyên giran ew neçar kirin ku berê xwe bidin cihên xwe yên berê.
Piştî têkçûna Şoreşa Îlonê li sala 1975ê, rejîma Be'sê hemû hewlên xwe ji bo rêgirtin li vejîna şoreşa Kurdî û sînordarkirina çalakiyên Pêşmerge, kirin, ji bo vê yekê çend hêzên çekdar ên kirêgirtî ji kurdan ku alîgirên wî bûn û guharên guhên wan bûn wek yekîneyên taybet ava kirin, ji bilî wê piştî destpêkirina şerê di navbera Iraq û Îranê de di Îlona 1980 de, çend tabûrên sivik vekirin û bi hezaran kurd çekdar kirin, li wê yekê jî tevahiya Kurdistanê bi hêzên leşkerî yên mezin, Tîp û Lîwa, bi çekên giran, tank, top û balafirên şer tije bû[1].
Ji bo şoreşê jî piştî kongreya nehê ya Partiya Dêmokrata a Kurdistanê (PDK) di Mijdara 1979an de li Rojhilatê Kurdistanê hatî lidarxistin[2], li ser ronahiya biryarên kongreyê, amadekarî hatin kirin ku hêzên Pêşmerge bi forma yekîneyên taybet vegerin Kurdistanê, ji bo pêwendî bi alîgirên şoreşê re û destpêkirina birêxistinkirina bajaran û pêkanîna çalakiyên Pêşmergeyan.[3]
Di 22'ê Adara 1980'an de hêzeke ji 55 pêşmergeyan pêk dihat, bi fermandariya Elî Qadir, Osman Qasim, Se'do Korkî û Omer Elî ku di nav çar koman de dabeş bûn, dema ku li Batîfa ya devera Behdînan bi erkên xwe yên pêşmergetiyê re mijûl bûn, wan agahî standin ku Sedam Husên, serokê wê demê yê rejîma Iraqê, serdana wê deverê dike, diyar e ev derfeteke baş bû ji bo hêzên Pêşmerge di wê kêliyê de çalakiyekê pêk bînin, ji bo wê armancê serê sibê li yek ji rêyên sereke yên deverê kemînek danîn, Se'et 11:30 deqîqe 4 otomobîlên leşkerî ji corê Eva derkeftin û ketin kemîna Pêşmerge, bi teqeya yekem a Pêşmerge, her 4 otomobîlên leşkerî hatin têkbirin û di encamê de gelek leşkerên Iraqê hatin kuştin û birîndarkirin.[4]
Di vê demê de hêzeke leşkerî ya girêdayî Lîwaya Batîfa ya artêşa Iraqê ji aliyê rojhilatê deverê ve ji bo alîkariya hêzên şikestî giheşte cihê pevçûnê, herwiha hêzeke din a leşkerî ya ketîbeya Deşta Çîyê, hêzeke ketîbeya Avgeniyê û hêza Bedir a girêdayî lîwaya Zaxo jî hatin qada şer. Di encamê de şerekî giran di navbera hêzên hikûmetê û Hêzên Pêşmerge de derket û heta tariya şevê berdewam kir, piştre hêzên dewletê şikestin û vekişiyan yekîneyên xwe yên leşkerî. Piştî şikestina artêşa Iraqê, hêzên Pêşmerge ji cihê bûyerê derketin û ber bi gundê Bêxebarê û piştre jî ber bi gundên Bilêjanê, Korka, Hişara û Berê Birîsk ve ketin rê û bi roj xwe vedişartin û bi şev di meşiyan heta gihiştin baregeha liqa 1.
Di vî şerî de artêşa Iraqê derbeyên giran xwarin û nêzî 120 leşker û pilebilind hatin kuştin û birîndarkirin. Di vî şerî de 2 pêşmergeyên bi navê Salih Xîlafteyî û Husên Merûf şehîd bûn ku termên wan ketin destê hêzên leşkerî yên rejîmê, her wiha 2 pêşmerge jî birîndar bûn û welatiyekê sivîl bi navê Ehmed Yehya Teyîb jî şehîd bû.[ ]
Çavkanî:
-
Mihemed mirad: Xebata Çiya, bîrhatin û serhatiyên Şoreşa Gulanê dinavbera salên (1976-1989)da, çapxana kurdistanê – zaxo, 2007.
-
Mesûd Barzanî: Barzanî û Tevgera Rizgarîxwaz a Kurd, berg 4, 1975-1990 Şoreşa Gulanê, Beş 2, Çapa Yekem, Çapxaneya Ruksana, 2021.
-
Desteya Insîklopediya Partiya Dêmokrata a Kurdistanê: Dîroka Partiya Demokrat a Kurdistanê – Kongire û Konferans (Bername û Rêbazên Navxweyî), Berg 1, Çapa Yekem, Çapxaneya Rojhelat, 2021.
-
Hacî Mîrxan Dolemerî: Lêgerîna Edaletê, Berg 2, Çapa Duyem, Kurdistan – 2021.
