Reşîd Mihemed Feqo bi navê Reşîd Îsomerî hatiye nas kirin. Di sala 1941 li gundê Îsomer ya li devera Barzan ser bi qeza Mêrgesorê ya parêzgeha Hewlêrê ji dayik bûye. Di sala 1975 piştî şikesta şoreşa Eylûlê koçberî welatê Îranê bûye û li bajarê Nexede nîştecîh bûye. Li wir ji bajarê Kerec hatiye veguhestin. Di sala 1991 piştî serhildan û raperîna cemaweriya Başûrê Kurdistanê vegeriya ye Başûrê Kurdistanê. Li roja 7 ê temmuza sala 2013 koça dawî kiriye.

Di sala 1961 piştî destpêkirina şoreşa Eylûlê peywendiyê bi hêzên Pêşmergeyên şoreşa Eylûlê re kiriye û li cem Zubêr Feqo yê biraya xwe bûye Pêşmerge. Reşîd Mihemed Feqo beşdariya şerên Geliyê Zawîte û Lomana û Maxobiznî ya li devera Behdînanê kiriye. Di sala 1962 piştî şehîdbûna Zubêr Feqo yê birayê xwe ya li şerê Mirêba li cihê wî bûye Serqol. Beşdariya şerên Serê Akrê ya li sala 1962 û şerê Pîris li sala 1963 de kiriye. Piştî paqijkirina devera Behdînan ji artêş û cehşên Iraqê, bi Mele Mistefa Barzanî re derbasî devera Soran bûye û li wir bûye pasevanê taybetî yê Mele Mistefa Barzanî û heta sala 1975 li wê erkê de berdewam bûye.

Di sala 1991 piştî serhildan û raperîna cemaweriya Başûrê Kurdistanê vegeriya ye Kurdistanê û beşdariya şerê dijî artêşa Iraqê kiriye. Di sala 1993 bûye berpirsê Lîjneya Civakî ya ser bi Mekteba Civakiya Giştî ya li gundên Nizarî.

Li 16 ê Tebaxa 1996 li 50 saliya salvegera damezrandina Partiya Dêmokrata Kurdistanê de, ji ber wan xizmetên ku pêşkêşî Kurd û Kurdistan û rêbaza Barzanî kiriye, ji aliyê Serok Mesûd Barzanî ve madalya Barzanî wergirtiye.

Çavkanî:

1. Arşîva Desteya Însîklopediya Partiya Dêmokrata Kurdistanê.