شەهید مەحمود ئیحمەد ڕۆستەم لە ساڵی 1965 لە گوندی کانێسکانی بناری چیای سورێن لە ناحیەی خورمال سەر بە پارێزگای هەڵەبجە لەدایک بووە. سەرەتا گوندنشین بووە و خەریکی کشتوکاڵ بووە. پاشان دوای شکستی شۆڕشی ئەیلول، گوندەکەیان لەلایەن ڕژێمی ئەوکاتەی عێراقەوە وێران کرا و بە زۆرەملێ لە شارۆچکەی باریکێ لە نزیک قەزای سەیدسادق نیشتەجێ کران. مەحمود ئیحمەد ڕۆستەم دەبێتە ژنی ماڵەوە و ناوی بنەماڵەکەی هێپسە ئەبدوڵا بووە و کچێکیشی بە ناوی باکسان بووە.

ساڵی 1981 بووە بە کادری کۆمیتەی قەزای پێنجوێنی فیرقەی چواری پارتی دیموکراتی کوردستان و لە ساڵی 1984 بۆ ماوەی ساڵێک بووەتە پێشمەرگە لە بەشی سەربازی کۆمیتەی قەزای دەربەندیخانی فیرقەی چواری پارتی دیموکراتی کوردستان. پاشان لە ساڵی 1985 بە فەرمانی بەرپرسی فیرقەی چواری پارتی دیموکراتی کوردستان گواسترایەوە بۆ لیژنەی قەزای پێنجوێن و پلەی بەرپرسی فیرقەی پێنجی قەزاکەی وەرگرت و لە هەمان کاتیشدا بوو بە بەرپرسیار لە چالاکییە حزبییەکانی ئەو شارە.

ناوبراو لە کۆمەڵێک چالاکیی حزبایەتیدا بەشداری کردووە، دیارترینیان هێرشکردنە سەر بنکەی پۆلیسی سەیدسادق و هێرشکردنە سەر مۆزەخانەی قارەگۆڵ بووە.

لە ساڵی 1988 مەحمود ئیحمەد ڕۆستەم و چەند هاوڕێیەکی لەسەر ڕێگای نێوان هەڵەبجە و سلێمانی و لەسەر ئاستی گوندی قارەگۆلی لە دەشتی شارەزوور کاروانێکی سەربازی ڕژێمی بەعسیان بۆسەیەک دانا و توانیان چەند ئۆتۆمبێلێک بسوتێنن و کاروانە سەربازییەکە لەناوببەن. لەم چالاکییەدا مەحمود ئیحمەد ڕۆستەم هەڵگری چەکی RPG بوو و ڕۆڵێکی بەرزی هەبوو لە سووتاندنی ئۆتۆمبێلەکان. دوای ئەم کارە گەورەیە تیمێک لە ئاسایشی سلێمانی و هێزە تایبەتەکان لەلایەن ئاسایشی گشتی بەغداوە ڕاسپێردرا بۆ لێکۆڵینەوە و دەستگیرکردنی ئەو کەسانە. هەر لەبەر ئەم هۆکارە مەحمود احمد ڕۆستەم و چەند هاوڕێیەکیان بە ناوەکانی فەهمی حەمە ڕەحیم، جەبار ئەحمەد ساڵح، میحمەد حەمە کەریم، خالید عەلی، وەلی مەحمود عوسمان لە سەیدسادق و گوندەکانی دەوروبەری دەستگیرکران. دوای ساڵێک لە زیندانیکردنیان لە بنکەی پۆلیسی سلێمانی، بەمەبەستی دادگاییکردنیان گواسترانەوە بۆ بنکەی پۆلیسی گشتی کەرکوک و دواتر ڕەوانەی زیندانی ئەبوغرێب کران بۆ جێبەجێکردنی فەرمانی دادگا.

لە ٢٩ی تشرینی دووەمی ساڵی ١٩٨٩ مەحمود ئیحمەد ڕۆستەم و هاوڕێیەکی بە ناوی میحمەد هێمە کەریم لە زیندانی ئەبوغرێب هەڵواسرا و شەهید کران.

سەرچاوە:

1. ئەرشیفی ئینسایکلۆپیدیای پارتی دیموکراتی کوردستان