Hemîd Xwastî Îsmaîl, di sala 1939 li gundê Bazingîr ya li devera Sindiyan ser bi qeza Zaxo ya parêzgeha Dihokê ji dayik bûye. Xêzandar bûye û di sala 1975 piştî şikesta şoreşa Eylûlê koçberî welatê Îranê bûye û li bajarê Şino ya Rojhilatê Kurdistanê nîştecîh bûye û ji wir ve ew veguhestine komelgeha Seraw û Nîlufer li Kirmaşan. Paşê vegeraye bajaroka Nexede. Paşê malbata wî çûne wargeha Zêwe, li Zêwe ji bo komelgeha Rebet û ji wir ve jî ji bo wargeha Cehrumî ya parêzgeha Farisî (Şêraz) ya Başûrê Îranê hatine veguhestin, ji wir ve jî ew vediguhezin parêzgeha Yezd ya li nava welatê Îranê.
Di sala 1961 peywendiyê bi Hêzên Pêşmergeyên şoreşa Eylûlê kiriye û li cem Selman Sindî yê pismamê xwe bûye Pêşmerge. Heta sala 1965 li wê hêzê de maye. Piştî pêkanîna Betalyona Elî Halo bûye Serpel. Di sala 1967 çûye devera Berwarî Bala û li Hêza Esed Xoşewî de bûye Cîgirê Hemîd Hefzula Omer ku Fermandeyê Hêzên Destweşên bû li devera Dihok, Şêxan û Akrê.
Piştî peymana 11 ê Adara sala 1970 nav bihurî heta çar salan li Betalyona Sê ya Pasevaniya Balafirgeha Bamernê bûye. Di sala 1974 Cîgirê Fermandeyê Hêzê Destweşên bû û li şerên Balek, Gorez û Hawdiyan de beşdariyê kiriye. Di sala 1976 peywendiyê bi Hêzên Pêşmergeyên Şoreşa Gulanê re dike û li tixûbê Bakûrê Kurdistanê ve çûye gundê Hedîş ya li qeza Uludere. Li wir li gel xizmên xwe ku nêzîkî 25 kes dibin, mefrezeya Gerok ava dikin û dest dikin bi xebatê û li gundê Komate ku Baregeha Serekiya Serkirdayetiya Demkî ya Partiya Dêmokrata Kurdistanê bûye dimînin.
Di sala 1979 beşdariya kongreya nehem ya Partiya Dêmokrata Kurdistanê dike. Piştî temambûna kongreyê vegeriya ye cihê xwe û pileya Berpirsê Serbazî ya Lîjneya Navçeya Zaxo wergirtiye. Di sala 1984 ji bo Lîjneya Navçeya Amêdî hatiye veguhestin û bûye Endamê Lîjneya Navçeyê û Berpirsê Serbazî. Di sala 1986 bûye Endamê Leqa Yek û Berpirsê Serbazî ya Leqê. Di sala 1988 piştî operasyona Enfalê û kîmyabaran kirina navçeya Behdînan, Hemîd Xwastî derbasî Bakûrê Kurdistanê bûye û heta sala 1991 li wir maye.
Piştî raperîn û serhildana Başûrê Kurdistanê li sala 1991, nav bihurî bûye Endamê Leqa Yek li Dihokê û li heman demê de jî bûye Cîgirê Babekir Xêbarî Fermandeyê Leşkerê Kurdistanê li Zawîte. Di sala 2000 bi Mistefa Nêrweyî re Dezgeha Eylûlê li Dihokê damezrandin. Di sala 2003 Dezgeha Eylûlê li Zaxo hate vekirin û navbihurî bû bi berpirsê dezgehê.
Hemîd Xwastî li jiyana Pêşmergeyetiyê da beşdariya dehan şerên li şoreşa Eylûl û Gulanê kiriye. Di sala 1961 çekkirina Binkeya Polîsên Zaxo, di sala 1972 şerê Deşta Akrê û li wê şerê da birîndar bûye. Di sala 1974 şerê Geliyê Dihokê, di sala 1977 şerê Deşta Sindiyan, di sala 1983 şerê Çiyayê Serê Dêrê, di sala 1985 şerê Amêdî, li 26 ê Gulana 1987 çekkirina Binkeya Polîsên Balafirxaneya Bamernê, di sala 1987 Destana Kanî Masê û çendîn şerên din de beşdar bûye.
Li 16 ê Tebaxa 1996 li 50 saliya salvegera damezrandina Partiya Dêmokrata Kurdistanê de ji ber wan xizmetên pêşkêşî Kurd û Kurdistanê û rêbaza Barzanî kiriye, ji aliyê Serok Mesûd Barzanî ve medalya Barzanî wergirtiye. Di sala 2013 bi pileya Ferîq hatiye xanenişîn kirin.
Çavkanî:
1. Arşîva Desteya Însîklopediya Partiya Dêmokrata
