شەهید حەمید کەریم لە ساڵی ١٩٤٧ لە گوندی مەحمود قجەری سەر بە ناحیەی قۆرەتوو سەر بە ناوچەی جێرمیان لە دایکبووە. جووتیار بووە و کاری ئاژەڵداری کردووە. خوێندنی ئامادەیی تەواو کردووە. حەمید کەریم هاوسەرگیری لەگەڵ ڕێمزیە مەحمود کردووە و کوڕ و کچێکی بە ناوەکانی مێریوان و پێکسان هەبووە.
ساڵی 1962 پەیوەندی بە شۆڕشی ئەیلولەوە کردووە و بووەتە پێشمەرگە لە فیرقەی شەشەمی فەوجی حەوتەمی بیارەی هێزەکانی کاری پارتی دیموکراتی کوردستان، لەو کاتەدا سلێمان ئیتروشی سەرۆکی فیرقەی شەشەم و جەمال نامیق فەرماندەی فەوجی بووە. لە ساڵی ١٩٦٦ پلەی ڕائید لە هەمان فیرقە وەرگرتووە.
حەمید کەریم لە ماوەی پێشمەرگەدا دوو جار بریندار بووە. لە ساڵی 1965 لە شەڕ و پێکدادانێکدا لەگەڵ هێزە عێراقییەکان لەو کاتەدا لە بان گەمیشانە لە نزیک قەزای قورەتوو فیشەکێک بەر قۆڵی ڕاستی کەوت. لە ساڵی 1974 لە شەڕی بەرگری چیای بێمۆ بەهۆی تۆپبارانی سەنگەرەکانی پێشمەرگە لەلایەن حکومەتی ئەوکاتەی عێراقەوە چەند پارچەیەک بەر جەستەی کەوت و بۆ جاری دووەمیش بریندار دەبێت.
لە ساڵی ١٩٧٥ لە کاتی بەرگریکردن لە چیای بێمۆ، فیشەکی سەربازانی سوپای عێراق بەرکەوت و شەهید بوو. لە هەمان کاتدا لەگەڵ شەهید حەمید و دوو هەڤاڵی دیکە بە ناوەکانی یاروێلی و سەیفوڵڵا شەهید بوون. دواتر تەرمەکانیان لەلایەن مەلا عەزیزەوە گواسترایەوە بۆ ئێران و لە کەمپی ئەنزیل ڕادەستی بنەماڵەکانیان کرایەوە.
سەرچاوە:
- ئەرشیفی کۆمیتەی ئینسایکلۆپیدیای پارتی دیموکراتی کوردستان.
