Eşkere ye ku siyaseta dijminane ya hikûmeta Iraqê ya li hember Kurdistanê di reftarên hêzên leşkerî û kirêgirtiyan de derketiye hole ku her tim operasyonên leşkerî ji bo tunekirina kurdan û wêrankirin û şewitandina gundên kurdan pêk anîn lê her carê jî êrişên serbazî ji aliyê Hêzên Pêşmerge ve dihatin şikandin, ji ber vê yekê di sala 1987’an de li devera Behdînan xebatên Pêşmerge derbasî qonaxeke berfireh bûn, bi awayekê zor li hikûmetê kiribûn ku bi berdewamî li eniyên şer de bûn ligel Pêşmerge, sibeha 5ê Gulana 1987ê, hêzeke Pêşmerge ku ji Pêşmergeyên Komîteya Navçeya Amêdiyê, 3 rêxistinên girêdayî Komîteya Navçeya Gulan, 2 rêxistinên liqa yekem û hêzeke millî ya bi serpereştiya Dr. Roj Nûrî Şawês û Eqîd Elî û Seyîd Salih, êrîşeke mezin li ser baregeha alaya sivik a 111 kirin, ku şêwirmendê wê Şêx Nûrî Berzencî bû, li navçeya Dêreloka navçeya Amediyê, piştî şerekî giran û bi xwîn, navenda alayê û 81 çeperên li derdora alayê û dever ji aliyê hêzên Pêşmerge ve hatin girtin.

Di vê çalakiya pêşmerge de hêzên hikûmetê derbên giran xwarin û 38 kes hatin kuştin û zêdetirî (40) jî dîl hatin girtin û ketin destê pêşmerge, di nava girtiyan de pîlotê yekem, Ebdulhemîd Xetab Ebdullah fermandarê alayê jî hebû û sê leşker û yek cîgirê efser û sîh çeteyên (caş) hebûn, 16 çeteyên din jî xwe radestî Hêzên Pêşmerge kirin, herwiha ziyanên madî gihiştine hêzên hikûmetê ku şewitandina tirimbêleke Zirîpoş û 9 tirimbêlên leşkerî û 200 kalaşînkov û xaçerek, (R. P. G.), hawanek 82mm, hawanek 5.14mm, a Grnoff, (14) Amûrên Bêtelê, û hejmareke mezin ji gule, top û teqemeniyên topên R.P.G. bûn destkeftên Pêşmerge.

Piştî bidawîhatina êrişa Pêşmerge saet 13.00’an a heman rojê balafirên şer ên Iraqê herêm û navçe û baregeh û bingehên Pêşmerge bombebaran kirin, di dema êrişên esmanî yên Iraqê de Hêza Berevaniya Esmanî ya Pêşmerge bi mûşeka SAM7 helîkopterek xistin xwarê, 7 leşkerên di wê balafirê de ketin destê hêzên Pêşmerge, yek ji wan albayê firokevan Hemîd Seîd û pîlotê yekem ê firokevan Nizar Ednan bû, vê yekê jî bandoreke mezin li ser morala Pêşmerge li eniyên şer kir, di encama êrîşê de pêşmergeyek şehîd û 3 jî birîndar bûn.

Hêjayî gotinê ye ku her di wê êrîşê de topxaneyên şoreşê navend û bingehên artêşê û hêzên hikûmetê topbaran kirin, weke ku hatiye gotin, rojek piştî êrişa Pêşmerge bo ser hêzên Iraqê anku di 6ê Gulana 1987ê de Serok Mesûd Barzanî rêberê şoreşê li Çiyayê Gare bi amûrê Bêtelê peywendî bi berpirsên Pêşmerge kir ji bo pîrozbahiya serkeftinên Hêzên Pêşmerge ku di êrîşê de tomar kirine.

Çavkanî:

1. Mesûd Barzanî: Barzanî û Tevgera Rizgarîxwaz a Kurd, berg 4, 1975-1990 Şoreşa Gulanê, Beş 2, Çapa Yekem, Çapxaneya Ruxana, 2021.

2. Şimal Zêbarî: Çend rastiyên veşartî di Şoreşa Gulanê de, çapa yekem, çapxaneya Rojhelat, Hewlêr –2015.