Geliyê Reşave dikeve navçeya Amedî û Dêrelokê yên devera Behdînan, ji ber cihê erdnîgarî û viyana xelkê ji bo Hêzên Pêşmerge, lidarxistina çalakiyên partîzanî hêsantir bû, lewma di warê şoreş û berxwedanê de jî weke hemû deverên din ên Kurdistanê di piştgiriya şoreşê de roleke bibandor lîstin, hikûmeta Iraqê gelek caran li dijî Kurdistanê kampanyayên mezin li hin deverên taybet da destpêkirin, ji bo vegerandina navçeyên ku ketine destê Pêşmerge û bi giştî qutkirina dengê şoreş, bi hemû hêzên xwe yên çekdar şerê hêzên şoreşê dikir, ji ber ku liv û tevgera Pêşmerge û çalakiyên wan li piraniya deveran zêde bibûn, di destpêka Kanûna duyem a sala 1987an de, artêşa Iraqê û hêzên din ên çekdar êrîşeke mezin li dijî Etroş û Kela Kanîka li Behdînanê pêk anîn ku nêzîkî 20 rojan dom kir, bi hinceta ku ev dever di bin kontrola Hêzên Pêşmerge de ne.
Hêzên Pêşmergeyên Kurdistanê bi hêza leşkerî ya li ber dest weke hejmara Pêşmergeyan, çek û cebilxane şerê hêzên hikûmetê dikirin û derbên kujer lê didan, eşkere ye, wekî ku hatî gotin, di destpêka Kanûna duyem a 1987an de, hikûmetê operasyoneke leşkerî ya mezin li devera Atroş da destpêkirin, li deverên din jî hêzên Pêşmerge rêgirî li karwanên leşkerî kirin û çalakiyên curbicur ji bo kêmkirina fişara artêş û hêzên çekdar ên hikûmetê li eniyên şer pêk anîn.
Êvara 11'ê Kanûna duyem a 1987'an derdora seat 16.00'an li gundê Reşave dengê çekan gelek dihat, Hêzên Pêşmerge rêyên sereke yên Amêdî – Dêrelok girtin û karwanên leşkerî kirin armanc û êrîşî wan kirin ku diketin rê û ber bi eniya şer ve diçûn, her wiha êrîşî navenda tabûra Dêrelokê, navenda Partiya Be's û asayîşa bajarok kirin, xuya ye êrîşa hêzên pêşmerge ya li dijî hêzên Îraqî zerereke mezin gihand wan ku navenda alayê, baregeha Partiya Be's û baregeha asayîşê hatin şewitandin her wiha topek 82 mm, 2 tank, tirimbêleke Zirîpoş û tirimbêleke leşkerî hatin rûxandin.
Hêjayî gotinê ye ku çalakiyên Pêşmerge li piraniya navçeyên Kurdistanê bi awayeke berfireh belav bûne ku hikûmet rastî nerehetiyê hat bû ku her tim li ser operasyonên leşkerî bifikirî ku metirsiya li ser saziyên xwe rake.
Çavkanî:
-
Mesûd Barzanî: Barzanî û Tevgera Rizgarîxwaz a Kurd, berg 4, 1975-1990 Şoreşa Gulanê, Beş 2, Çapa Yekem, Çapxaneya Ruxana, 2021.
-
Şîmal Zêbarî: Çend rastiyên veşartî di Şoreşa Gulanê de, çapa yekem, çapxaneya Rojhelat, Hewlêr –2015.
