Di sala 1987ê de, li piraniya navçeyên Başûrê Kurdistanê, sînorên çalakî û kampanyayên Pêşmerge bo ser navend û baregeh û hemû cihên ku bi çeperên leşkerî û çekdarî yên hêzên Iraqê ve hatibûn dorpêçkirin, ew qas belav bû ku heta dezgehên leşkerî yên hikûmeta Iraqê jî xistibûn di amadebaşiyê de, her çende di gelek dem û cihên cuda de artêş, çete û hemû hêzên Iraqê êrîş ji bo deverên di bin kontrola Pêşmerge de, pêk anîn, lê belê êrîş û operasyonên leşkerî yên hikûmetê kêm bandor li astengkirina çalakiyên Pêşmerge kirin, berovajî vê yekê çalakî roj bi roj zêde dibûn.

Bi vê armancê di sala 1987ê de li baregeha liqa yekem ya Partiya Dêmokrata a Kurdistanê (PDK) li Kumate yê devera Badînan civînek ji aliyê berpirsên Pêşmerge ve hat lidarxistin, di civînê de hêzeke Pêşmerge di bin çavdêriya Milazim Mihemed û Cîgirê wî Zêwey de hate avakirin, li gel berpirsên din ên yekîneyên Pêşmerge, ji bo derbekê li hêzên leşkerî bixin û êrîşî baregeh û navendên leşkerî û çekdarên wan bikin, piştî ku Hêzên Pêşmerge vegeriyan sînorên çalakiya xwe, li ser çalakî û cihan gotûbêj û danûstandin hatin kirin, jibo vê carê yek ji Rebayên leşkerî yên artêşa Iraqê li hember bajarokê Şêladzê yê li ser Ava Zê hate destnîşankirin[3], eşkere ye ku armanca van xalên leşkerî ku hikûmetê li wan deran bi cih kiribûn serweriya deverê û rêgirtina li tevgera Pêşmerge bû.

Hêzên Pêşmerge pilanek ji bo bicihanîna erkê ku ji wan re hatiye dayîn, amade kirin, ji bo êrîşê saet sifir hate diyarkirin, ew şeva ku ji bo êrîşa li ser xala leşkerî hatibû diyarkirin di dem û cihê diyarkirî de hat kirin, dema êrîşa Pêşmerge destpêkir, di demeke pir kin de karîn Rabayê bi dest bixin, di serdegirtinê de hemû leşkerên li ser erka xwe bûn hatin kuştin û hemû çekên wan ku kalaşnîkovbûn hatin desteserkirin, piştî bi cih anîna erkê xwe yê giring, Pêşmerge ji ​​deverê derketin û bê ziyan vegeriyan baregeha liqê li Kumata.

Hêjayî gotinê ye ku hemû çalakiyên bi vî rengî yên Hêzên Pêşmerge peyamek bû ji bo desthilatdarên Be's ku şoreşa Kurd ji bo bidestxistina mafên xwe yên demokratîk dest ji dest bernade ku bi salan e ji bo vê têdikoşe û fedakariyê dike.

Çavkanî:

1. Mesûd Barzanî: Barzanî û Tevgera Rizgarîxwaz a Kurd, berg 4, 1975-1990 Şoreşa Gulanê, Beş 2, Çapa Yekem, Çapxaneya Ruksana, 2021.

2. Mohammed Murad: Xebata Çiya, Bîrhatin u Sarhatiyên Şoreşa Gulanê Dinavbere Salên (1976-1989), Çapxana Kurdistanê – Zaxo, 2007.

3. Şîmal Zêbarî: Çend rastiyên veşartî di Şoreşa Gulanê de, çapa yekem, çapxaneya Rojhelat, Hewlêr.