Di sala 1943 dema Mela Mistefa Barzanî ji Silêmaniyê vegeriya devera Barzan, peywendiyê bi hêzên şoreşgêran re kiriye û çek hilgirtiye. Ji ber jêhatîbûn û wêrekî û azayetiyê ew kirine Serqol. Beşdariya şerê gundê Bêstir ya binara çiyayê Pîran ya li qeza Mêrgesorê û şerê Meydan Morîk û şerên devera Bilê û Barzan û çiyayê Pîris ya li qeza Akrê de kiriye.
Li 11 ê Tişrîna Yekema 1945 piştî şikesta şoreşa duyema Barzan bi malbata xwe re diçin Rojhilatê Kurdistanê. Li 31 ê Adara 1946 li Hêza Barzan ya ser bi artêşa Komara Demokrata Kurdistanê li Mehabadê Pêşmerge bûye. Li şerên bereya Seqiz, bi taybetî şerê bi nav û dengê Qaraweya li Seruçawe de kiriye. Li 2 ê Şubata 1947 piştî rûxana komarê ya li şerê Nelos ji lingê xwe yê rastê ve bi dijwarî birîndar bûye û çavê xwe yê çepê jî ji dest daye. Ji ber dijwariya birînên xwe nekariye bi Barzanî û hevalên wî re biçê Yekîtiya Sovyetê. Ji bo wê yekê bi Şêx Ehmed Barzanî û malbata xwe ve vegeriyaye Başûrê Kurdistanê. Ji ber sedema ku kêmendam bûye, ji aliyê Hikûmeta Iraqê ve nehatiye destgîr kirin. Piştî başbûna birînên xwe diçe rêze çiyayên Biradostê û heta sala 1958 li wan çiyan maye û bi qaçaxî jiyaye. Ji bo peydakirina xwarin û xorekê çûye gundên deverê û xelkê wan gundan jî hevkariya wî kirine û xwarinê ji bo wî birine û li zivistanan jî ji bo xweparastina ji seqem û sermayê li şikeftên deverê de maye.
Di sala 1958 piştî ku Mele Mistefa Barzanî ji Yekîtiya Sovyetê vegeriya Iraqê û şoreşa Eylûlê destpêkir, Keko Mela Elî peywendiyê bi hêzên Pêşmergeyên şoreşê re kiriye. Bi Hemedemîn Mîrxan Mêrgesorî re bûye Pêşmerge û beşdariya şerê Geliya Zawîte ya li devera Behdînanê kiriye. Li 7 ê Şubata 1962 beşdariya şerê Mirêba ya li navçeya Şêxan ya li devera Behdînanê kiriye.
Piştî ku Mele Mistefa Barzanî derbasî navçeya Soranê bûye, Keko Mela Elî bi hêzekê re çûye navçeya Soran. Li wir beşdarî hemû şerên deverê de kiriye. Di sala 1962 li devera Sîdekan yek ji şerên deverê de bi sivikî birîndar bûye. Di sala 1963 li şerê Kêlî Binî Biya bi dijwarî birîndar bûye û ji ber dijwariya birînên xwe nikarê li Pêşmergeyetiyê de berdewam bibê. Her ji ber bandora wê birîna xwe 38 sal li nav cihan de dimîne, hevjîn û zarokên wî xizmeta wî kirine.
Li 16 ê Tebaxa 1996 ji ber wan xizmetên ku pêşkêşî Kurd û Kurdistanê û rêbaza Barzanî kiriye, li 50 saliya salvegera Partiya Demokrata Kurdistanê de, ji aliyê Serok Barzanî ve medalya Barzanî wergirtiye.
Çavkanî:
1. Arşîva Desteya Însîklopediya Partiya Dêmokrata Kurdistanê.
