Di sala 1976 dûbare peywendiyê bi rêxistinên nihêniyên PDK yên li tixûbê rêxistina Rizgarî ya ser bi Leqa Yek (1) dike. Di sala 1980 vegeriyaye nav rêzên Pêşmerge û li rêxistina Şehîd Xidir Mehmud de erkê Pêşmergeyetiyê encam daye û paşê li rêxistina Selahedînê Eyubî de bûye Cîgirê Berpirsê Serbazî yê rêxistinê.

Di sala 1988 li dema operasyona berfireha Enfalê û kîmyabaran kirina navçeya Behdînanê, bi hejmareke zêdeyê Pêşmergeyan û xelkê navçeyê re diçin Bakûrê Kurdistanê û paşê ji bo wargeha penaberan ya bajarê Muşê hatine veguhestin. Di sala 1992 vegeriyaye Başûrê Kurdistanê û bûye Fermandeyê Pelêkî Pêşmerge ya li devera Berwarî Bala ya li parêzgeha Dihokê. Paşê erkê berpirsiyarêtiya Betalyona 3 ya li Kesnezana parêzgeha Hewlêrê wergirtiye. Di sala 1997 bûye Fermandeyê Lîwa ya 18 ya li artêşa 14. Di sala 1998 bûye Fermandeyê Serbazî ya Leşkerên Zêrevanî li Berwarî Bala. Di sala 2000 bûye Fermandeyê Hêzê 7 ya li artêşa 18 û di sala 2002 bûye Fermandeyê Hêza 6 ya li artêşa 14.

Li roja 14 ê Tebaxa 1998 li dema hilgirtina mînêk (mayin) li nav qada topa pêya gundê Bêtkar ya li parêzgeha Dihokê, mîn diteqê û li encamê da çavê wî yê çepê ji bînînê dikeve û guhên wî êdî nabihîsin. Li jiyana Pêşmergeyetiyê da nêzîkî 25 şeran da beşdar bûye û heft caran jî birîndar bûye.

Li meha Eylûla sala 1986 du bira û du biraza û kurekî Îsmaîl Bêtkarî ji ber bombebarana balafirên cengiyên rejîma Iraqê şehîd bûne. Birayekî wî yê bi navê Îzet li meha Kanuna Yekema heman salê da, şehîd bûye. Sadiq Bêtkarî ku bavê wî jî Pêşmergeyê şoreşa Eylûlê bûye li sala 1993 li wargeha penaberan ya bajarê Muşê hate jehrawî kirin.

Îsmaîl Bêtkarî ji ber kêm endam bûna xwe ve bi pileya Lîwa hatiye xanenişîn kirin û niha li Dihokê dijî. Di sala 2010 li kongreya sêzdehem ya Partiya Dêmokrata Kurdistanê de ji aliyê Serok Mesûd Barzanî ve medalya Barzanî wergirtiye.

Çavkanî:

1. Arşîva Desteya Însîklopediya Partiya Dêmokrata Kurdistanê.