Jiyanname

Elî Baba Îsmaîl Heqî Elî Resûl, ku bi navên (Doktor Elî Baba, Doktor Elî û Xale Doktor), tê naskirin, di sala 1940 an de li bajarê Silêmaniyê ji dayik bûye. Kurê ronakbîr û şoreşger Îsmaîl Heqî Şawês (1898 - 1976) e ku endamê çalak ê Hizba Xoybûn a Kurd e. Bavê wî damezrînerê çendîn komeleyên siyasî yên Kurd li Başûrê Kurdistanê bûye. Di sala 1968 an de mastera xwe ya mîmariyê ji Enstîtuya Moskowê wergirtiye. Di sala 1969 an de wek endezyar di Rêveberiya Xwecihî ya Silêmaniyê de dest bi kar kiriye. Di sala 1970 an de di Şaredariya Silêmaniyê de dest bi kar kiriye. Di sala 1975 an de piştî têkçûna Şoreşa Îlonê, dibe penaber li Îranê û piştre bi fermana Serkirdatiya Demkî ya Partiya Dêmokrat a Kurdistanê dişînin derveyî welat. Di sala 1977 an de doktoraya xwe ya mîmariyê ji Enstîtuya Moskowê wergirtiye. Di salên (1977 - 1981) de li Yekîtiya Sovyetê wek penaber jiyaye û venegeriya Başûrê Kurdistanê. Di salên (1981 - 1984) de li Belçîkayê wek penaber niştecih bûye. Di sala 1985 an de bi daxwaza Serok Mesûd Barzanî vegeriya Başûrê Kurdistanê. Di salên (1985 - 1990) de li Îranê wek penaber jiyaye. Di 6ê Kanûna Yekem a 1990 an de li Rojhilatê Kurdistanê koça dawî kiriye û destpêkê li goristana bajarokê Merîwanê li Rojhilatê Kurdistanê hatiye veşartin. Piştî Raperîna Başûrê Kurdistanê, careke din li goristana Girê Seywanê ya bajarê Silêmaniyê hatiye veşartin. Ew di zimanên Kurdî, Erebî, Rûsî, Farisî û Fransî de jêhatî bûye.

Xebatname

Di sala 1957 an de tevlî rêzên Yekîtiya Xwendekarên Kurdistanê bûye. Di sala 1957 an de tevlî rêzên Partiyê (PDK) bûye. Di sala 1959 an de tevlî rêzên Yekîtiya Ciwanên Dêmokrat a Kurdistanê bûye. Di sala 1959 an de tevlî Yekîtiya Mamosteyên Kurdistanê bûye. Di sala 1959 an de endamê Komîteya Rêxistina Ciwanan bûye. Di sala 1970 an de endamê Komîteya Herêma Silêmaniyê ya ser bi Komîteya Şaxa Çaran a Partiya Dêmokrat a Kurdistanê bûye. Di sala 1974 an de tevlî rêzên Hêza Pêşmerge bûye. Di sala 1984 an de bûye kargêrê Komîteya Şaxa Şeşan a Ewropayê ya Partiya Dêmokrat a Kurdistanê. Sernivîskarê Kovara Ezmer bûye ku ji aliyê Komîteya Şaxa Çaran ve hatiye çapkirin. Di sala 1988 an de beşdarî Destana Xwakurkê li ser tixûbê parêzgeha Hewlêrê li dijî hêzên artêşa Iraqê bûye. Di sala 1989 an de ji aliyê nûnerên kongreyê ve wek endamê Komîteya Navendî ya Partiya Dêmokrat a Kurdistanê (Kongreya Dehemîn a Partiya Dêmokrat a Kurdistanê) hate hilbijartin. Di sala 1989 an de berpirsê duyemîn ê Komîteya Şaxa Çaran bûye.

Çavkanî :

1 - Arşîva Desteya Însîklopediya Partiya Dêmokrat a Kurdistanê.

2 - Îbrahîm Mehmûd, Dewleta Haco Axa Kurdî, (Şam – Dar el - Zeman ji bo Çapkirin û Belavkirinê – 2018), r. 648.

3 - Hebîb Mihemed Kerîm, Dîroka Partiya Dêmokrat a Kurdistanê – Iraq (Di qonaxên sereke de) 1946 – 1993, (Dihok – Çapxaneya Xebat – 1998), r. 174, 488.

4 - Şe'ban Elî Şe'ban, Hinek Agahiyên Siyasî û Dîrokî, Çapa Sêyemîn, (Hewlêr – Çapxaneya Rojhilat – 2013), r. 121.

5 - Ebdulxalid Sabir (Mamosta Xalid), Şecereya Malbatên Kevnare yên Silêmaniyê di navbera Salên 1784 – 1914 de, Çapa Duyemîn, (Beyrût – Çapxaneya Green Glory – 2010), r. 569 – 572.

6 - Osman Sengeserî, Beşek ji Jiyana Rêberên Nemir ên Kurdistanê, (Silêmanî – Çapxaneya Sîma – 2014), r. 71.