Ehmed Awa navçeyeke geştyarî ya xweş e dikeve Geliyê Zelmê ya navçeya Xurmale ya parêzgeha Helebce, 84 km li rojhilatê Silêmaniyê ye, di dema Şoreşa Gulanê de, gelek dastan û êrişên hêzên Pêşmerge li wê deverê hatin kirin ku êrişî bingeh û baregehên leşkerî û çekdarî yên hikûmeta Iraqê kiribûn, di encamê de dirbên kujer bi ser wan de anîne û peyama zindîbûna şoreşê, parastina mafê gelê Kurd ê azadiyê û pêkanîna demokrasiyê di guhên wan de hat bû pispisandin.
Di 1ê Tîrmeha 1987ê de, Hêzên Pêşmergeyên Kurdistanê planeke berfireh ji bo êrîşkirina çend çeperên leşkerî yên artêşa Iraqê û hêzên çekdar ên hikûmetê amade kirin, bi armanca operasyoneke mezin a partîzanî li Ehmed Awa û Hana Qolê, piştî bidawîhatina amadekariyên operasyonê, Hêzên Pêşmerge li wê deverê êrîşeke berfireh li ser artêş, çeteyan û Artêşa Niştimanî (Ceyş Şaabî) pêk anîn, di demeke kin de wan karîn baregeha çeteyên (Caş), baregeheke artêşa Iraqê û baregehên Ceyş El-Şeabî yên li herêmê bi dest bixin.
Di êrîşa Pêşmerge de hêzên hikûmeta Iraqê derbên giran xwarin ku bi sedan kes hatin kuştin û birîndarkirin, herwiha nêzîkî 220 leşker û çekdarên hikûmetê dîl hatin girtin, destkefta şoreşê di vê dastanê de hejmareke zêde ya çek û alavên serbazî bû, ku têde nêzîkî hezar parçe çekên curbicur bûn, hêjayî gotinê ye ku ew navçe 2 rojan di destê pêşmergeyan de bû û piştre paşve vekişiyan û ji deverê derketin, piştî ku di dastanê de derbeke kujer li hêzên hikûmeta Iraqê ket, hêzên Pêşmerge jî bê ziyan nebûn, lê 7 pêşmerge şehîd bûn bi navên Serdar Hacî Husên, Şêx Kamil Firyasî, Xerîb Dole Sorî, Elî Mela, Kawe Derbendî, Qadir Cebar û Hesen Marif.
Diyar e hebûna dastanên wiha yên hêzên şoreşê bandoreke erênî ya mezin li ser morala bilind a Pêşmerge kir, bi taybetî jî di warê xwebawerî û hesta berpirsyariyê de, di heman demê de, ew şikestineke mezin bû ji bo artêş û çekdarên hikûmetê, ku hêzeke wan a mezin tijî çekên pêşketî bûn, ku di her şerekî de ziyanên canî û madî yên giran dixwin.
Çavkanî:
-
Mesûd Barzanî, Barzanî û Tevgera Rizgarîxwaz a Kurd, berg 4, 1975-1990 Şoreşa Gulanê, Beş 2, Çapa Yekem, Çapxaneya Ruksana, 2021.
-
Ehmed Awa, https://ar.wikipedia.org/wiki/%D.
-
Nûrî Heme Elî, Dîroka Têkoşîna Pêşmergekî Di Navbera Jiyan û Mirinê de, Çapa Duyem, Çapxaneya Şehab, Hewlêr – 2016.
