Elî Silêman Ebdula Silêman, di sala 1943 li gundê Hostan ya li devera Barzan ser bi qeza Mêrgesor ya parêzgeha Hewlêrê ji dayik bûye. Di sala 1961 peywendiyê bi rêzên hêzên Pêşmergeyên şoreşa Eylûlê re kiriye. Li hêza taybetî ya General Mistefa Barzanî de pasevan bûye. Li heman salê da bi General Mistefa Barzanî re derbasî devera Behdînan bûye û li şerê Geliyê Zawîte de beşdariyê kiriye. Di sala 1962 çûye devera Birîfkan, Etruş, Dola Nale û bi Mele Şinî, Halî Dolemerî û Omer Axayê Dolemerî re li şerê Serê Akrê de beşdariyê kiriye. Li heman salê da bi General Mistefa Barzanî re derbasî devera Soran bûye û li şerê çekkirina Qişleya Rayat de beşdariyê kiriye. Di sala 1963 dema rejîma Iraqê êrîşî ser devera Barzan kiriye, nav bihurî bi General Mistefa Barzanî re vegeriya ye devera Barzan û li şerên Serê Akrê û Çiyayê Pîris de beşdariyê kiriye û li wê şerê da birîndar bûye. Li meha Tişrîna duyema heman salê de vegeriya ye devera Soran.
Di sala 1964 wekî pasevanê General Mistefa Barzanî li Dola Şehîdan, Lêwje, Çom Sarkê, li pişta Dîlmanê de hatiye erkdar kirin. Di sala 1965 çûye Hacî Omeran û li payîza heman salê da bi General Mistefa Barzanî re li gundê Sacî bûye. Li bihara sala 1966 ji ber bombebarana balafirên cengî yên rejîma Iraqê vegeriya ye Dîlman. Heta meha Nîsana 1974 li erkê pasevanê General Mistefa Barzanî li gundê Dîlman de berdewam bûye. Di sala 1975 piştî şikesta şoreşa Eylûlê koçberî welatê Îranê dibe û li bajarê Nexede ya Rojhilatê Kurdistanê de nîştecîh dibe. Paşê diçê bajarê Kerec û pasevanê mala General Mistefa Barzanî bûye. Piştî koça dawî ya General Mistefa Barzanî, çûye Silîvana û li wir bûye pasevanê Serok Mesûd Barzanî Serokê Partiya Dêmokrata Kurdistanê. Li 30 ê Tebaxa 1986 bi Serok Mesûd Barzanî çûye devera Nêrweya parêzgeha Dihokê. Piştî 11 mehan vegeriya ye Baregeha Mekteba Siyasî ya Partiya Dêmokrata Kurdistanê ya li gundê Rajan ya Rojhilatê Kurdistanê. Di sala 1988 beşdariya destana Xwakurkê kiriye.
Li roja 7 ê Adara sala 1991 berî destpêkirina serhildan û raperîna cemaweriya Başûrê Kurdistanê, bi Serok Mesûd Barzanî re çûye Qasmereş. Paşê li hemû hengavên raperînê de pê re bûye. Di sala 2013 bi pileya serbazî ya Serdariyê (Ferîq) hatiye erkdar kirin.
Li 16 ê Tebaxa 1996 li 50 saliya salvegera damezrandina Partiya Dêmokrata Kurdistanê de, ji ber wan xizmetên ku pêşkêşî Kurd û Kurdistanê kiriye, ji aliyê Serok Mesûd Barzanî ve madalya Barzanî wergirtiye.
Çavkanî:
- Arşîva Desteya Ansîklopediya Partiya Dêmokrata Kurdistanê.
