ژیاننامە
حسۆ مەحمود بابەکر، ساڵى ١٩٣٧ لە گوندى کانیەلنجى قەزاى مێرگەسۆرى سەر بەپارێزگاى هەولێر لەدایک بووە، ساڵى ١٩٧٥ پاش نسکۆى شۆڕشی ئەیلوول ئاوارەى وڵاتى ئێران بووە و لە لورستان و زێوە نیشتەجێ بووە، دواى ڕاپەڕینى ساڵى ١٩٩١ى خەڵکى کوردستان گەڕاوەتەوە کوردستان، بێجگە لەزمانى دایک زمانى فارسی بەباشى دەزانێت.
خەباتنامە
ساڵى ١٩٥٩ پەیوەندى بەهێزى پێشمەرگە کردووە و لە قۆڵى ئەحمەد مستێ بۆتە پێشمەرگە، چەندین پلەى لە هێزى پێشمەرگە وەرگرتووە، لەوانە ساڵى ١٩٦١جێگرى سەرقۆڵ، ساڵى ١٩٧٠ سەرلق و جێگرى ئامرى بالى ڕاست لە لقى دکتۆر سەعید ئەحمەد نادر، ساڵى ١٩٧٩ جێگرى قوەت بارزان، ساڵى ١٩٨٨ بۆتە بەرپرسی هێزى پێشمەرگەى ڕێکخراوى شیرین، ساڵى ١٩٩١ بۆتە بەرپرسی ڕێکخراوى شیرین.
ساڵى ١٩٧٤ خولى ڕاهێنانى دۆشکەى ٣٠ ملمى بینیوە، لەچەندین شەڕى بەرگریکردن لە کوردستان دژى سوپاى عێراق بەشدارى کردووە، سێ جار بریندار بووە، ساڵى ١٩٦٣ لە شەڕى چامە لە نزیک ناحیەى شێروان مەزن و ساڵى ١٩٧٤ لە چیاى مامەڕوت لە قەزاى چۆمان و ساڵى ١٩٩٥ لە شەڕى ڕواندز.
لە چوار کۆنگرەى پارتى دیموکراتى کوردستان وەک ئەندامى کۆنگرە بەشدارى کردووە، کۆنگرەی ٩ ساڵى ١٩٧٩ و کۆنگرەی١٠ ساڵى ١٩٨٩ لە ڕۆژهەڵاتى کوردستان، کۆنگرەی ١٢ ساڵى ١٩٩٩ و کۆنگرەی ١٣ ساڵى ٢٠١٠ لە شارى هەولێر، لە کۆنگرەى سێزدەیەم لەلایەن سەرۆک مەسعود بارزانی میدالیاى بارزانى نەمرى پێ بەخشراوە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
