عه‌بدوڵا سدیق ئه‌حمه‌دسایب ته‌ها، ناسراو به ڕه‌ئیس عه‌بدوڵا به‌رواری و دووپشك، ئه‌فسه‌ر و سیاسه‌تمه‌دار، ساڵی ١٩٤٥ په‌یوه‌ندی به ڕیزه‌كانی حزبی ڕزگاری كورده‌وه كردووه به ناوی نهێنی (دووپشك) خزمه‌تی كردووه، ساڵی ١٩٥٠ په‌یوه‌ندی به ڕیزه‌كانی پارتی دیموکراتی کوردستانه‌وه كردووه، ساڵی ١٩٥٠ چووته ڕیزی سوپای لیڤی، له ٣ی ئایاری ١٩٥٥ به‌شداری خولێكی شه‌ش مانگی سوپای عێراقی كردووه و به پله‌ی مولازمی دووه‌م ده‌رچووه، ساڵی ١٩٧٩ کۆنگرەی نۆیه‌م به ئه‌ندامی كۆمیته‌ی ناوه‌ندی و مه‌كته‌بی سیاسی پارتی دیموكراتی كوردستان هه‌ڵبژێردراوه، ساڵی ١٩٨١ له شاری ڤییه‌نا كۆچی دوایی كردووه.
ژیاننامه
عه‌بدوڵا سدیق ئه‌حمه‌د سایب ته‌ها له پارێزگای دهۆك له دایك بووه، ساڵی ١٩٤٥ په‌یوه‌ندی به ڕیزه‌كانی حزبی ڕزگاری كورده‌وه كردووه به ناوی نهێنی (دووپشك) خزمه‌تی كردووه، ساڵی ١٩٥٠ په‌یوه‌ندی به ڕیزه‌كانی پارتی دیموکراتی کورده‌وه كردووه، ساڵی ١٩٥٠ چووته ڕیزی سوپای لیڤی كه له ژێر سه‌رپه‌رشتی سوپای شانشینی یه‌كگرتووی بریتانیا بووه، له ڕێكه‌وتی ٣ی ئایاری ١٩٥٥ به‌شداری خولێكی شه‌ش مانگی سوپای عێراقی كردووه و به پله‌ی مولازمی دووه‌م ده‌رچووه، ساڵی ١٩٦٠ شه‌ره‌فی ئه‌ندامێتی پارتی وه‌رگرتووه، ساڵانی (١٩٦٥- ١٩٦٧) له‌به‌ر چالاكی سیاسی له‌لایه‌ن ده‌زگای هه‌واڵگری سوپای عێراقه‌وه له به‌ندیخانه‌ی نوگره سه‌لمان به‌ند كراوه و له ڕیزه‌كانی سوپای كۆماری عێراق ده‌ركراوه، ساڵی ١٩٦٧ له‌دوای ئازادكردنی له به‌ندیخانه به پله‌ی نه‌قیب په‌یوه‌ندی به ڕیزه‌كانی شۆڕشه‌وه كردووه،
خه‌باتنامه
عه‌بدوڵا سدیق ئه‌حمه‌دسایب ته‌ها ساڵی ١٩٦٧ فه‌رمانده‌ی به‌تالیۆنی سێ سورداش سه‌ر به هێزی ڕزگاری سه‌ر به له‌شكری سێ بووه، ساڵی ١٩٦٧ جێگری فه‌رمانده‌ی هێزی ڕزگاری سه‌ر به له‌شكری سێ بووه، ساڵی ١٩٦٨ به‌شداری شه‌ڕی سورداش دژ به هێزی سوپای عێراق بووه، له ٦ی تشرینی دووه‌می ١٩٦٩دا یه‌كێك بووه له فه‌رمانده‌كانی شه‌ڕی مه‌رگه له سنووری پارێزگای سلێمانی دژ به هه‌ڵمه‌تی سوپای عێراق بووه، له كۆتایی ساڵی ١٩٦٩ یه‌كێك بووه له فه‌رمانده‌كانی شه‌ڕی سورداش له سنووری پارێزگای سلێمانی، ساڵی (١٩٦٩-١٩٧٠) فه‌رمانده‌ی هێزی ڕزگاری سه‌ر به له‌شكری سێ بووه، ساڵی ١٩٧٠ له‌دوای ڕێكه‌وتننامه‌ی ١١ی ئادار له نێوان سه‌ركردایه‌تی شۆڕشی ئەیلوول و حكوومه‌تی عێراق به پله‌ی ڕائید فه‌رمانده‌ی به‌تالیۆنی شه‌شی سورداشی پاسه‌وانانی سنوور (حرس الحدود) ده‌ستنیشانكراوه.
ساڵی ١٩٧١ له‌لایه‌ن ده‌سه‌ڵاتدارانی عێراق فه‌رمانی گرتنی ده‌رچوو و په‌یوه‌ندی به هێزی پێشمه‌رگه‌وه كرد، ساڵی ١٩٧٤ بۆ جاری دووه‌م په‌یوه‌ندی به ڕیزه‌كانی هێزی پێشمه‌رگه‌وه كردووه‌ته‌وه، ساڵی ١٩٧٥ له دوای نسكۆی شۆڕشی ئەیلوول ئاواره‌ی شانشینی ئێران بووه، له مانگی نیسانی ١٩٧٥ سه‌رۆك مه‌سعود بارزانی به مه‌به‌ستی ئاماده‌كاری بۆ شۆڕشی گوڵان په‌یوه‌ندی پێوه كردووه. ساڵانی (١٩٧٦-١٩٧٩) ماڵی له شارۆچكه‌ی كه‌ره‌جی نزیك شاری تاران له شانشینی ئێران په‌ناگای ئه‌و پێشمه‌رگانه بوو كه بۆ ناوچه ئازادكراوه‌كان ده‌گواسترانه‌وه و له‌وێ به مه‌به‌ستی چاره‌سه‌ری ده‌گه‌ڕانه‌وه، ساڵی ١٩٧٧ به مه‌به‌ستی چاره‌سه‌ری ڕوو له شاری له‌نده‌ن كردووه، ساڵی ١٩٧٩ له‌لایه‌ن نوێنه‌رانی كۆنگره‌وه به ئه‌ندامی كۆمیته‌ی ناوه‌ندی پارتی دیموكراتی كوردستان (كۆنگره‌ی نۆیه‌م) هه‌ڵبژێردراوه، ساڵی ١٩٧٩ له یه‌كه‌مین كۆبوونه‌وه‌ی كۆمیته‌ی ناوه‌ندی پارتی دیموكراتی كوردستاندا به ئه‌ندامی مه‌كته‌بی سیاسی هه‌ڵبژێردراوه، له مانگی ئابی ١٩٧٩ له‌به‌ر نه‌خۆشی داوای مافی په‌نابه‌ری له شانشینی یه‌كگرتووی بریتانیا كردووه.
له مانگی كانوونی یه‌كه‌می ١٩٧٩دا به‌رپرسی یه‌كه‌می هێزه‌كانی پارتی دیموكراتی كوردستان بووه كه له لێژنه‌ی لقی دوو و لێژنه‌ی لقی سێ و لێژنه‌ی لقی چواری پارتی دیموكراتی كوردستان پێك ده‌هات و له چیای به‌مۆوه وه‌ك ناوه‌ندی ده‌ستپێك بوون، له كۆتایی ساڵی ١٩٨٠دا وه‌ك فه‌رمانده‌یه‌ك و ئه‌ندامی مه‌كته‌بی سه‌ربازی پارتی دیموكراتی كوردستان به‌شداری له شه‌ڕی حاجی ئۆمه‌ران سه‌ر به پارێزگای هه‌ولێر دژ به هێزی سوپای عێراقدا كردووه و له‌م شه‌ڕه برێندار بووه، له ڕۆژی ٢٨ی تشرینی یه‌كه‌م ١٩٨١ له شاری ڤییه‌نا به نه‌خۆشی شێرپه‌نجه‌ی جه‌رگ كۆچی دوایی كردووه و هه‌ر له‌وێ ئه‌مانه‌تی خاك كراوه. له ڕۆژی ٤ی تشرینی دووه‌می ٢٠٠١دا كه‌ژاوه‌ی ته‌رمه‌كه‌ی له سنووری حاجی ئۆمه‌رانه‌وه به‌ره‌و باشووری كوردستان هێنراوه‌ته‌وه و له گۆڕستانی شاخكێ له شاری دهۆك به‌خاك سپێردراوه. شاره‌زای زمانه‌كانی كوردی، عه‌ره‌بی، ئینگلیزی و فارسی بووه.
سه‌رچاوه:
١. ئه‌رشیفی ده‌سته‌ی ئینسكلۆپیدیای پارتی دیموكراتی كوردستان.
