ژیاننامە
ئەحمۆ مەحمود هەرکی لە ساڵی ١٩٥٤ لە گوندی دیوینی بناری پیرمام لەدایک بووە، دەرچووی قۆناغی سەرەتایی بووە لە قوتابخانەی سەری ڕەش لە پیرمام ، لەساڵی ١٩٧٥ ئاوارەی وڵاتی ئێران دەبێت، شەهید ئەحمۆ خاوەن چوار منداڵە بە ناوەکانی ئازاد، عەبدوڵا، ئەسرین و سنوور، ئازادی کوڕی لە ١٨ی کانوونی یەکەمی ١٩٩٣ شەهید بووە.
خەباتنامە
ئەحمۆ مەحمود هەرکی لە ساڵی ١٩٧٠ پەیوەندی بە ڕیزی پارتی دیموکراتی کوردستان دەکات، لە ساڵی ١٩٧٤ دەبێتە پێشمەرگە و بەشداری شەڕی دەربەندی کۆڕێ دەکات، دوای دەگوازێتەوە بەتالیۆنی یەکی هێزی باڵەک و بەشداری داستانەکانی گۆرەز، زۆزک، گەرووی عومەر ئاغا و سەرتیز دەکات.
لەساڵی ١٩٧٥ ئاوارەی وڵاتی ئێران دەبێت و بەردەوام دەبێت لەخەباتکردن لە ڕێکخستنە نهێنیەکانی پارتی، لەساڵی ١٩٧٩ دەبێتەوە پێشمەرگە و بەشداری شۆڕشی گوڵان دەکات، لەساڵی ١٩٨٠ دا لەگەڵ مەفرەزەیەک دەگوازرێتەوە لقی دووی پارتی دیموکراتی کوردستان و لە لیژنە ناوچەی شەقڵاوە دەست بە خەبات دەکات کە بارەگاکەی لە سەکران و ئێنێ بووە سەر بە قەزای چۆمان.
لەساڵی ١٩٨١ بەشداری شەڕەکانی وەرتێ، زینی ئەستێرۆکان، زارگەلی و چیای پێڕەش دەکات لە شەڕی چیای پێڕەش بریندار دەبێت کە ژمارەی پێشمەرگەکان ١٥ کەس بووە.
لەساڵی ١٩٨٢ دەبێتە کارگێڕی ڕێکخراوی سەڵاحەدین و لە زۆربەی چالاکییەکانی لقی دوو بەشدار بووە، وەکو چالاکی لێدانی بنکەی پۆلیسی هەریر، ڕێگای دێگەڵە – کۆیە، چەندین جار بە کاری پارتایەتی دەچێتە هەولێر، پیرمام، شەقڵاوە و هەریر، بەداخەوە لە رێکەوتی ٢١ی کانوونی دووەمی ١٩٨٣ لەگەڵ دوو هەڤاڵی تر بە ئەرکێک دەچنە هەولێر و بە پیلانێکی داڕێژراو دەکەونە بۆسەی ئیستخباراتی رژێمی به‌عس عێراق و پاش شەڕێکی دەستەویەخەدا هەر سێکیان بەدیل دەگیرێن و بێسەر و شوێن دەکرێن، پاش ساڵێک هەر دوو هەڤاڵی ئازاد دەکرێن، بەڵام هەڤاڵ ئەحمۆ بێسەر و شوێن دەکرێت و تا ئێستاش چارەنووسی نادیارە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
