ژیاننامە
ئاراس حسۆ میرخان ساڵی ١٩٦٨ لە شاری سلێمانی لەدایکبووە، ساڵی ١٩٩٣ به‌كالۆریۆس و ساڵی ١٩٩٦ ماسته‌ر و ساڵی ١٩٩٨ دكتۆرای ده‌رمانسازیی له زانكۆی ئەسفه‌هان له وڵاتی ئێران وه‌رگرتووه، ساڵی ٢٠٠٩ ماسته‌ری كارگێڕیی له زانكۆی لوبنانی-فەڕه‌نسی له هه‌ولێر بەدەستهێناوە، ساڵانی (٢٠٠٠-٢٠٠١) لە کابینەی چوارەمدا بووه‌ته به‌ڕێوه‌به‌ری گشتیی ڕۆشنبیری و ڕاگه‌یاندنی وه‌زاره‌تی پێشمه‌رگه و ساڵانی (٢٠٠٢-٢٠١١) بەڕێوەبەری گشتیی دیوانی چاودێری و دارایی حكومه‌تی هه‌رێمی كوردستان بووە. شاره‌زایی لە زمانه‌كانی كوردی، فارسی، توركی و ئینگلیزیدا هەیە.
خەباتنامە
ئاراس حسۆ میرخان ساڵی ١٩٧٥ له دوای نسكۆی شۆڕشی ئەیلوول له‌گه‌ڵ بنه‌ماڵه‌كه‌ی ئاواره‌ی ئێران بووه، ساڵی ١٩٨٢ په‌یوه‌ندی به ڕیزه‌كانی یه‌كێتی قوتابیانی كوردستان و ساڵی ١٩٨٨ په‌یوه‌ندی به ڕیزه‌كانی هێزی پێشمه‌رگه‌ی كوردستانه‌وه كردووه و لە داستانی خواكوڕك بەشداریی کردووە.
ساڵی ١٩٩٥ بووه‌ته فه‌رمانده‌ی به‌تالیۆنی شه‌هید عه‌لی حسۆ و له شه‌ڕی بەرگریی قه‌سرێ له سنووری پارێزگای هەولێر بریندار بووه، ساڵی ١٩٩٧ لە شەڕی بەرگری لە هەرێمی کوردستان له ده‌ڤه‌ری ئامێدی سه‌ر به پارێزگای دهۆك بۆ جاری دووەم بریندار بووه، ساڵی ٢٠١٤ به‌شداریی شه‌ڕی دژ به هێزه‌كانی داعشی له به‌ره‌ی گوێڕ-مه‌خمور له سنووری پارێزگای هه‌ولێر كردووه.
لە ماوەی کارکردنیدا لە ڕیزەکانی پارتی دیموكراتی كوردستان چەندین ئەرک و بەرپرسیاریەتی وەرگرتووە، وەکو به‌رپرسی لێژنه‌ی ناوچه‌ی زانكۆی سه‌ر به مه‌كته‌بی سیاسی له نێوان قوتابیانی پەنابەری زانكۆ و په‌یمانگاكانی ئێران ١٩٩٠، جێگری به‌رپرسی مه‌كته‌بی ڕێكخستنی پێشمه‌رگه (١٩٩٨-٢٠٠٠)، ئه‌ندام مه‌كته‌ب له مه‌كته‌بی سه‌رۆك (٢٠٠٠-٢٠١٠)، به‌رپرسی لقی شازدە‌ی ده‌وروبه‌ری هه‌ولێر (٢٠١١-٢٠١٧)، به‌رپرسی ده‌زگای وەبەرهێنان پارتی ٢٠٢٠ و...هتد
نوێنەری کۆنگرەکانی یازده‌یه‌‌م ١٩٩٣ و دوازدەیەم ١٩٩٩ بووە و ساڵی ٢٠١٠ لە كۆنگره‌ی سێزده‌یه‌‌مدا به ئه‌ندامی ئه‌نجومه‌نی سه‌ركردایه‌تی پارتی دیموكراتی كوردستان هه‌ڵبژێردراوه، ساڵی ٢٠٢٢ لە کۆنگرەی چوارده‌مدا به ئه‌ندامی كۆمیته‌ی ناوه‌ندی پارتی دیموکراتی کوردستان هه‌ڵبژێردراوە.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
