ژیاننامه
هاشم ئەلیاس سلو یێ به‌رنیاس ب مەحمود ئێزدی، سالا ١٩٤٤ێ ل ناحیا باعەدرێ هاتیە سەر دونیایێ، پشتی نسکۆيا شۆڕەشا ئەیلوولێ دگەل خێزانا خو ئاوارەیێ ئیرانێ دبیت، پشتی چەند هەیڤا خێزان و برایێ خۆ حسێن و زاروکێت خو ڕەوانەی عیراقێ دکەت ئانکو تەسلیمی رژێما عێراقێ دبن، ل شەڤا ١٨ ل سە ر ١٩ ئابا ١٩٧٩ ێ ل گوندێ رەدنیا ل بەرێ گارەی ب دەستەکێ خیانەتکاری دھێتە شەهید کرن.
ل سالا ١٩٨٥د شۆرەشا گولانێ دا جەنازێ شەهیدی هاتە ڤەگوهاستن بۆ دەرێگەلی کانی مازی دەڤەرا بەرواریا، ل ١٨ێ ئابا ٢٠٠١ هاتەڤەگوهاستن بۆ لالشێ ب مەراسیمەک سەربازی ب ئامەدەبوونا نوێنەرێ جەنابێ سەرۆک مسعود بارزانی، ل سالا ٢٠١١ێ ل چوار ریانا شێخان پەیکەرێ شەهید نەمر مەحمود ئێزيدی هاتە ڤەکرن ژ لایی وەزارەتا رەوشەنبیری یا حكومه‌تا هه‌رێما كوردستانێ.
خه‌باتنامه
شه‌هید هاشم ئەلیاس سلو یێ به‌رنیاس ب مەحمود ئێزدی، پشتی ژیانەکا سەخت د لەشکەرێ عیراقێ دا و فێربوونەکە باش د ئەرکێ سەربازیدا، ل سالا ١٩٦٣ دەستپێکا شۆڕەشی ئەیلوولێ هاتیە دناڤ رێزێن پارتی ديموكراتى كوردستان دا و بوویە پێشمەرگە و بەردەوام بوو ل سەر خەباتێ تا سالا ١٩٧٥ێ، شەهید مەحمود چەندین چاڤپێکەفتنا دکەت و بریارێ ددەت دگەل چەند هەڤالا سنورێ ئێران و عێراق و تورکیا تێپەرینیت بەرەڤ سوریا و بەشداری چەند خولێن مەشق و راهێنانێ ل سوریا بکەت، هەرل وی دەمی نەئارامی بۆ شەهید مەحمود و هەڤالێن وی پەیدا دبیت و مەجبور دبن دەربازی تورکیا ببن و دچنە ناڤ گوندێن گویی و قشوریا.
شەهید مەحمود د گەل عادل مزوری و چەند هەڤالا دەربازی کوردستانا عیراقێ دبن و ل سەر لێڤا خابوری ل کوماتەی ل کومبوونەکا فراوان ب بەژداربوونا سامی عەبدولڕەحمان و جەوهەر نامیق و زەعیم عەلی و کەریم شنگالی، پەیاما شۆرەشی و بڕیارا سەرکردایەتیا کاتی و چەندین بەلاڤوکا هەلدگرن و ل ٣ێ ئادارا ١٩٧٦ دەست بکارێ رێکخستنێ دکەن وچەندین پێشمەرگەهێن ئەیلوولی دبینن و پەیاما بارزانی دگەهینتە وان و چەندين رێکخراوێن نهێنی د دامەزرینن.
ئێکه‌م گولەيا شوره‌شا گوڵانا پێشکەفتن خواز ل ده‌ڤه‌رێ ل سەر دەستێ شەهیدی سه‌ركرده و چه‌ندين هه‌ڤچەپەرێن خوه هاتیه هاڤێتن، بارەگايێن عەسکەری يێن رژێما بەعسی دکەنە ئارمانج و هەر ل وێ رۆژی شورەشا گولانێ هاتە هەڵگیرساندن، پشتی تورا وان دھێتە ئاشکەراکرن ژ بەر چالاکیێن بەرفرە، زور هەڤالێن وان خۆ دگەهینە دناڤ رێزێن شورەشێ دا و دبنە پێشمەرگە و بەردەوام دبن و چالاکیێن خۆیێن لەشکه‌ری ئەنجام ددەن بۆ سه‌ر رەبیێن دوژمنی ئێک ل دوڤ ئێکێ دکەنە ئارمانج.
شەهیدێ فەرماندە مەحمود ئیزیدی ل چەندين شەر و داستان و چالاکياندا پشكدار بوويه و رولەکێ بەرچاڤ ھەبوويه ل شەرێ پێلکێفێ کو دوو جاران بریندار دبیت، شەرێ ئەتروش، شەمکانی، گەلی کورتکی، بەرکجکی، ئەلقوش، سەرسنکێ، گەلی کورتکێ دڤی شەریدا بریندار دبیت، داستانا سەرسنکێ، داستانا چەمان، دوستەکا و کانی، نسرێ، بانی، دێرەلوش، دەکان، بلان، شەرێ مەتینی و گارەى وهتد...
چەندين هونەرمەند و هەلبەستڤانا ل سه ر قارەمانەتی و ئەفسانەیا شەهيدێ نەمر مەحمود ئیزیدی هەلبەست نڤێسینە و گوتينه وەکو قادر قاچاخ، جەعفەر ئێمینکی، مەحمود، مؤيد تەيب، عەبدولرەحمان مزوری، قادر حەسەن مه سوزه و مەجيد حسو، عارف حيتو، هشيار رێکانی، حسێن باعەدرى، ژارو دهوکی، حەبيب كەلەش، هەژی گوتنێیە قادر حەسەن و د. سەعید خودێدا پەرتوکەک سەر ژیانا شەهید مەحمود ئیزیدی چاپ کریە.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
