ژیاننامە
مەجید حەمەد رەسوڵ حەمەد، لە ساڵی ١٩٣٣ لە گوندی خۆرانی سەربە قەزای شەقڵاوە لە دایکبووە، گوندنشین بووە و سەرقاڵی کاری جوتیاری بووە، خێزانی مەجید حەمەد ناوی گوڵناز بەکر و کوڕەکانی ناویان شەمسەدین، نەجمەدین، مشیر، عەبدولواحید و کاکلە و کچەکانی ناویان حەلیمە، شیرین، غەزال، عەیشان و سوزانە.
خەباتنامە
مەجید حەمەد لە ساڵی ١٩٦٨ بووە پێشمەرگە لە لقی حەوت بە فەرماندەیی هاشم باپیر ئاقوبانی سەر بە بەتالیۆنی سێی سەفین بە فەرماندەیی رەسوڵ فەقێ سەربە هێزی سەفینی پارتی دیموکراتی کوردستان، بەشداری لە شەڕەکانی ئاقوبان و کڵاو قاسم و شەڕی ئاوەگرد و شەڕی دەربەندی کۆڕێ و شەڕی دۆلی هیران سەرتاسەری و شەڕی ماکۆک و شیشار کردووە، لە شۆڕشی گوڵان لە ساڵی ١٩٨٤ دووبارە بووە پێشمەرگە لە هێزی سەفینی پارتی دیموکراتی کوردستان، کە لەوکاتەدا رەسوڵ فەقێ فەرماندەی هێز بووە و مەجید حەمەد وەک پێشمەرگەی دەستەی بارەگای هێز ئەرکی بینیوە.
مەجید حەمەد لە ساڵی ١٩٨٦ بە پشوویەکی چەند ڕۆژە دەگەڕێتەوە گوندی خۆران و ئاشکرا کراوە، بۆیە لە بەرەبەیانی ڕۆژی ١٣ی تشرینی دووەمی ١٩٨٦ هێزێکی زۆری جاش و سەربازی ڕژێمی بەعس چواردەوری ماڵیان دەگرن و مەجید حەمەد خۆی ڕادەست ناکات و ڕووبەڕوویان بوویەوە، لە ئەنجامدا بە سەختی بریندار دەبێت و بە برینداری دەستگیر کراوە، جاشەکان بە برینداری تا دەروازەی گوندی ڕاپێچ دەکەن و لە دەروازەی گوند گوللهبارانیان کردووە و شەهید بووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
