ئه‌فسه‌ر و ئابووریناس و سیاسه‌تمه‌دار محه‌مه‌د موسا سادق، ناسراو به محه‌مه‌د فه‌یلی، ساڵی ١٩٥٠ له كۆنفڕانسی یه‌كه‌می به‌غدا له‌لایه‌ن نوێنه‌رانی كۆنفڕانسه‌وه به ئه‌ندامی كۆمیته‌ی ناوه‌ندی پارتی دیموكراتی كورد هه‌ڵبژێردراوه، ساڵی ١٩٥٣ له ده‌سته‌ی دامه‌زرێنه‌ری یه‌كێتی لاوانی دیموكراتی كوردستان بووه، هەمان ساڵ له كۆنگره‌ی یه‌كه‌می یه‌كێتی قوتابیانی كوردستاندا به ئه‌ندامی ده‌سته‌ی كارگێڕی هه‌ڵبژێردراوه، ساڵی ١٩٥٣ بووه‌ته یه‌كه‌مین سكرتێری یه‌كێتی لاوانی دیموكراتی كوردستان، له دوای كۆنفرانسی ماوه‌ت و لێكترازان وازی له پارتی هێناوه، ساڵی ٢٠٠٧ له به‌غدا كوچی دوایی كردووه.
ژیاننامه
محه‌مه‌د موسا سادق ساڵی ١٩٢٧ لە به‌غدا لەدایکبووه، له بنه‌ماڵه‌یه‌كی كوردی فه‌یلی بازرگانه و خۆیشی به كاری بازرگانییەوە خه‌ریك بووه، ساڵی ١٩٥٣ به‌كالۆریۆسی له كۆلێژی بازرگانی و ئابووری زانکۆی به‌غدا وه‌رگرتووه، ساڵی ٢٠٠٧ له شاری به‌غدا كۆچی دوایی كردووه و له گۆڕستانی نه‌جه‌ف به خاك سپێردراوه. شاره‌زای زمانه‌كانی كوردی، عه‌ره‌بی و ئینگلیزی بووه.
خه‌باتنامه
محه‌مه‌د موسا سادق ساڵی ١٩٤٧ له ڕێی دكتۆر جه‌عفه‌ر محه‌مه‌د كه‌ریم (١٩١٠-٢٠٠٠) په‌یوه‌ندی به ڕیزه‌كانی پارتی دیموكراتی كورده‌وه كردووه، ساڵی ١٩٥٠ له کۆنفرانسی یه‌كه‌م له شاری به‌غدا له‌لایه‌ن نوێنه‌رانی كۆنفڕانسه‌وه به ئه‌ندامی كۆمیته‌ی ناوه‌ندی پارتی دیموكراتی كورد هه‌ڵبژێردراوه و له دوای دكتۆر جه‌عفه‌ر فه‌یلی به دووه‌مین كوردی فه‌یلی له سه‌ركردایه‌تی پارتی دیموكراتی كورددا هه‌ژمار ده‌كرێت.
نوێنه‌ری کۆنگرەی دووه‌م ١٩٥١، سێیه‌م ١٩٥٣، چواره‌م ١٩٥٩ و پێنجه‌م ١٩٦٠ی پارتی بووە، ساڵی ١٩٥٣ له ده‌سته‌ی دامه‌زرێنه‌ری یه‌كێتی لاوانی دیموكراتی كوردستان له شاری به‌غدا بووه و بووه‌ته یه‌كه‌مین سكرتێری یه‌كێتی لاوانی دیموكراتی كوردستان و هەمان ساڵ له كۆنگره‌ی یه‌كه‌می یه‌كێتی قوتابیانی كوردستاندا به ئه‌ندامی ده‌سته‌ی كارگێڕی هه‌ڵبژێردراوه.
ساڵی ١٩٥٩ به‌شداری كۆنفڕانسی دووه‌می به‌غدای پارتی دیموكراتی یه‌كگرتووی كوردستان له شاری به‌غدای كردووه و دژ به باڵی هه‌مزه عه‌بدولا ده‌نگی داوە به سركردنیان تا كۆنگره‌ی چواره‌می پارتی، ساڵی ١٩٦٤ له لێكترازانی نێو پارتی دیموكراتی كوردستان، وازی له چالاكی پارتایه‌تی هێناوه.
سه‌رچاوه‌كان:
- ئه‌رشیفی ده‌سته‌ی ئێنسكلۆپێدیا پارتی دیموکراتی کوردستان.
- مێژووی پارتی دیموکراتی کوردستان، كۆنگره و كۆنفرانس (پرۆگرام و په‌یڕه‌وی ناوخۆ)، ده‌سته‌ی ئینسكلۆپیدیای پارتی دیموکراتی کوردستان، به‌رگی یه‌كه‌م، (هه‌ولێر- چاپخانه‌ی رۆكسانا- ٢٠٢١).
- مه‌هدی محه‌مه‌د قادر، پێشهاته سیاسییه‌كانی كوردستانی عێراق ١٩٤٥ ـ ١٩٥٨، (سلێمانی ـ سه‌نته‌ری لێكۆڵینه‌وه‌ی ستراتیجیی كوردستان ـ ٢٠٠٥ز).
- حبیب محمد كریم، تأریخ الحزب الدیمقراطي الكوردستاني ـ العراق (في محطات رئیسیة) ١٩٤٦ ـ ١٩٩٣، (دهوك ـ مطبعة خه‌بات ـ ١٩٩٨م).
- نه‌وزاد فوئاد ڕه‌شید، چه‌پكه گوڵێك له مێژووی یه‌كێتی لاوانی دیموكراتی كوردستان، (هه‌ولێر ـ چاپخانه‌ی وڵات ـ ٢٠١٤ز).
- مام جلال، لمناسبة مرور ٤٦ عاما علی تأسیس اتحاد طلبة كردستان، صحیفة الاتحاد، الصحیفة المركزیة للاتحاد الوطني الكردستاني، العدد ٣٠٦، السنة السابعة، السلیمانیة، الجمعة، ١٩ شباط ١٩٩٩م.
