سه‌عد عه‌بدوڵا عوسمان سوبحان، ناسراو به مامۆستا سه‌عد، ب. گۆران، ئاگر و هیوا، ساڵی ١٩٦٨ په‌یوه‌ندی به ڕیزه‌كانی پارتی دیموكراتی كوردستانه‌وه كردووه، ساڵی ١٩٩٣ له‌لایه‌ن نوێنه‌رانی کۆنگرەی یازده‌یه‌‌می پارتی دیموكراتی كوردستان به ئه‌ندامی كۆمیته‌ی ناوه‌ندی پارتی دیموكراتی كوردستان ـ یه‌كگرتوو هه‌ڵبژێردراوه، ساڵی ١٩٩٩ له‌لایه‌ن نوێنه‌رانی كۆنگره‌وه به ئه‌ندامی كۆمیته‌ی ناوه‌ندی پارتی دیموكراتی كوردستان کۆنگرەی دوازدەیەم هه‌ڵبژێردراوه، له ٢٠ی كانوونی یه‌كه‌می ١٩٩٩ له ئه‌نجومه‌نی نیشتمانی كوردستان سوێندی یاسای خوارد و كراوه‌ته وه‌زیری كشتوكاڵ و ئاودێری حكومه‌تی هه‌رێمی كوردستان (كابینه‌ی چواره‌م).
ژیاننامه
سه‌عد عه‌بدوڵا عوسمان سوبحان، ناسراو به مامۆستا سه‌عد، ب. گۆران، ئاگر و هیوا، ساڵی ١٩٤٩ له شاری هه‌ولێر له‌دایك بووه، خوێندنی سه‌ره‌تایی و ناوه‌ندی له‌شاری هه‌ولێر ته‌واو كردووه، ساڵی ١٩٦٩ به‌شی مێژووی خانه‌ی مامۆستایانی هه‌ولێری ته‌واو كردووه، ساڵی ١٩٧٥ له دوای نسكۆی شۆڕشی ئەیلوول سه‌ره‌تا ڕووی له شانشینی ئێران كردووه، ساڵی ٢٠٠١ به‌كالۆریۆسی له به‌شی یاسا له زانكۆی سه‌ڵاحه‌دین (هه‌ولێر) وه‌رگرتووه، باوكی دكتۆر چنار سه‌عه‌د عه‌بدوڵا ئه‌ندامی ئه‌نجومه‌نی سه‌ركردایه‌تی پارتی دیموكراتی كوردستانه، له ١ی شوباتی ٢٠٠٤ له كرده‌وه‌یه‌كی خۆكوژی ئه‌ندامێكی گروپی (القاعدة) له ناو باره‌گای لێژنه‌ی لقی دوو له هه‌ولێر له كاتی جه‌ژنه پیرۆزه له جه‌ماوه‌ری شاری هه‌ولێر شه‌هید كراوه. شاره‌زای زمانه‌كانی كوردی، عه‌ره‌بی، فارسی و ئینگلیزی بووه.
خه‌باتنامه
ساڵی ١٩٦٣ په‌یوه‌ندی به ڕیزه‌كانی یه‌كێتی قوتابیانی كوردستانه‌وه كردووه و به ناوی نهێنی ئاگر ناسراو بووه، ساڵی ١٩٦٧ به ناوی نهێنی هیوا ناسراو بووه، ساڵی ١٩٦٨ په‌یوه‌ندی به ڕیزه‌كانی پارتی دیموكراتی كوردستانه‌وه كردووه و، ساڵی ١٩٧٤ په‌یوه‌ندی به ڕیزه‌كانی هێزی پێشمه‌رگه‌وه كردووه، له ڕۆژی ٧ی ئایاری ١٩٧٤ له‌گه‌ڵ ٤١ قوتابی تردا به‌شداری خولی پێنجه‌می فێرگه‌ی پێگه‌یاندنی كادیرانی پارتی دیموكراتی كوردستانی له گوندی زینوێی شێخی پارێزگای هه‌ولێر كردووه و له ٨ی ئابی ١٩٧٤ به پله‌ی یه‌كه‌م ده‌رچووه، ساڵی ١٩٧٤ ئه‌ندامی لێژنه‌ی ناوچه‌ی ڕواندزی سه‌ر به لێژنه‌ی لقی دووی پارتی دیموكراتی كوردستان بووه، ساڵی ١٩٧٥ له دوای نسكۆی شۆڕشی ئەیلوول سه‌ره‌تا ڕووی له شانشینی ئێران كردووه و هه‌ر زوو گه‌ڕاوه‌ته‌وه باشووری كوردستان، ساڵی ١٩٧٥ په‌یوه‌ندی به ڕیزه‌كانی بزووتنه‌وه‌ی سۆسیالیستی كوردستانه‌وه كردووه، ساڵی ١٩٧٦ یه‌كه‌مین كورته‌چیرۆكی خۆی له ژێر ناونیشانی (دارگوێزه‌كان) له گۆڤاری ڕۆژی كوردستاندا بڵاو كردووه‌ته‌وه، ساڵی ١٩٧٧ بۆ ماوه‌یه‌كی كورت له‌لایه‌ن ده‌زگای ئاسایشی گشتیی حكومه‌تی عێراقه‌وه به تاوانی كوردایه‌تی به‌ند كراوه، له سه‌ره‌تای مانگی نیسانی ١٩٧٩ بۆ جاری دووه‌م له‌لایه‌ن ئه‌منی هه‌ولێری سه‌ر به ده‌سه‌ڵاتدارانی حزبی به‌عسی عه‌ره‌بی سۆسیالیستییه‌وه ده‌ستبه‌سه‌ر كراوه و دواتر ئازاد كراوه.
ساڵی ١٩٧٩ په‌یوه‌ندی به ڕیزه‌كانی هێزی پێشمه‌رگه‌ی حزبی سۆسیالیستی كوردستانه‌وه كردووه، ساڵی ١٩٨٠ یه‌كێك بووه له دامه‌زرێنه‌رانی به‌ره‌ی جوقه‌د بۆ نه‌یارانی ڕژێمی سه‌دام حسێن (١٩٣٧ـ٢٠٠٦) ناسراو به سه‌دام تكریتی، ساڵی ١٩٨١ له‌لایه‌ن نوێنه‌رانی كۆنگره‌وه به ئه‌ندامی كۆمیته‌ی ناوه‌ندی حزبی سۆسیالیستی كوردستان (كۆنگره‌ی یه‌كه‌م) هه‌ڵبژێردراوه، ساڵی ١٩٨٨ به ئه‌ندامی مه‌كته‌بی ڕاگه‌یاندنی به‌ره‌ی كوردستانی هه‌ڵبژێردراوه، ساڵی ١٩٩١ به‌شداری له ڕاپه‌ڕینی باشووری كوردستاندا كردووه، له ٩ی ئاداری ١٩٩١ به‌شداری ئازادكردنی شارۆچكه‌ی كۆیه‌ی سنووری پارێزگای هه‌ولێر كردووه و بۆ جه‌ماوه‌ر وتاری خوێندووه‌ته‌وه، ساڵی ١٩٩١ به‌شداری له شه‌ڕی دووه‌می داستانی كۆڕێ له سنووری پارێزگای هه‌ولێردا كردووه له دژی تیپێكی زرێپوشی سوپای عێراق، له ١٩ی ئاداری به نوێنه‌رایه‌تی حزبی سۆسیالیستی كوردستان به‌شداری كۆبوونه‌وه‌ی به‌ره‌ی كوردستانی به مه‌به‌ستی دیاركردنی كاتی هه‌ڵبژاردنی ئه‌نجومه‌نی نیشتمانی كوردستان و بارودۆخی ئابووری و ئاسایشی باشووری كوردستانی كردووه، له سه‌ره‌تای ساڵی ١٩٩٢ به نوێنه‌رایه‌تی حزبی سۆسیالیستی كوردستان به‌شداری كۆبوونه‌وه‌ی به‌ره‌ی كوردستانی به مه‌به‌ستی دامه‌زراندنی لێژنه‌ی باڵای سه‌رپه‌رشتی هه‌ڵبژاردنی ئه‌نجومه‌نی نیشتمانی كوردستانی كرد، له ٧ی نیسانی ١٩٩٢ به‌شداری كۆبوونه‌وه‌ی فراوانی پیرمامی به‌ره‌ی كوردستانی كردووه به مه‌به‌ستی ئاماده‌كاری بۆ پرۆسه‌ی هه‌ڵبژاردنی ئه‌نجومه‌نی نیشتمانی كوردستان، ساڵی ١٩٩٢ پاڵێوراوی لیستی یه‌كگرتن بۆ پرۆسه‌ی هه‌ڵبژاردنی ئه‌نجومه‌نی نیشتمانی كوردستان بووه.
ڕۆژی پێنجشه‌مه‌ی ٢٠ی ئابی ١٩٩٢ له شاری هه‌ولێر به‌شداری كۆنگره‌ی یه‌كه‌می حزبی یه‌كگرتنی كوردستانی كردووه و له ڕۆژی پێنجشه‌مه‌ی ٢٧ی ئابی ١٩٩٢ له‌لایه‌ن نوێنه‌رانی كۆنگره‌وه به ئه‌ندامی كۆمیته‌ی ناوه‌ندی حزبی یه‌كگرتنی كوردستان هه‌ڵبژێردراوه، ساڵی ١٩٩٢ كراوه‌ته به‌رپرسی ده‌زگای ڕێكخراوه پیشه‌یی و جه‌ماوه‌رییه‌كان و ئه‌ندامی ده‌زگای توێژینه‌وه و لێكۆڵینه‌وه‌ی (حزبی یه‌كگرتنی كوردستان)، ساڵی ١٩٩٣ به‌شداری كۆنگره‌ی دووه‌می حزبی یه‌كگرتنی كوردستان له شاری هه‌ولێری كردووه به مه‌به‌ستی هه‌ڵوه‌شاندنه‌وه‌ی حزبی یه‌كگرتنی كوردستان و یه‌كگرتن له‌گه‌ڵ پارتی دیموكراتی كوردستان، ساڵی ١٩٩٣ له‌لایه‌ن نوێنه‌رانی كۆنگره‌وه به ئه‌ندامی كۆمیته‌ی ناوه‌ندی پارتی دیموكراتی كوردستان ـ یه‌كگرتوو کۆنگرەی یازدهیهم هه‌ڵبژێردراوه، ساڵانی (١٩٩٣-١٩٩٩) له ستافی بیست و حه‌وته‌می لێژنه‌ی لقی دووی هه‌ولێری پارتی دیموكراتی كوردستان بووه‌ته به‌رپرسی لێژنه‌ی لق، ساڵی ١٩٩٩ له‌لایه‌ن نوێنه‌رانی كۆنگره‌وه به ئه‌ندامی كۆمیته‌ی ناوه‌ندی پارتی دیموكراتی كوردستان کۆنگرەی دوازدەیەم هه‌ڵبژێردراوه، له ٢٠ی كانوونی یه‌كه‌می ١٩٩٩ له ئه‌نجومه‌نی نیشتمانی كوردستان سوێندی یاسای خوارد و كراوه‌ته وه‌زیری كشتوكاڵ و ئاودێری حكومه‌تی هه‌رێمی كوردستان (كابینه‌ی چواره‌م)، له ڕێكه‌وتی ١٤ی تشرینی دووه‌می ٢٠٠٢ به بڕیاری سه‌رۆك مەسعود بارزانی به ئه‌ندامی لێژنه‌ی پاڵپشتی لێژنه‌ی لقی دووی هه‌ولێر بۆ په‌یوه‌ندی له‌گه‌ڵ جه‌ماوه‌ر ده‌ستنیشان كراوه، ، ساڵی ٢٠٠٤ بووه‌ته ئه‌ندامی مه‌كته‌بی سیاسی پارتی دیموكراتی كوردستان، ساڵی ٢٠٠٤ بووه‌ته به‌رپرسی لێژنه‌ی لقی دووی هه‌ولێر.
له به‌رهه‌مه‌كانی:
- تاقه ماڵ ـ ١٩٨٧.
- ئه‌و پیاوه‌ی پێده‌كه‌نێ ـ ١٩٨٨، وه‌رگێڕان.
- نه‌وشیروان مسته‌فا له شیری هه‌تا پیری ـ چه‌ند سه‌رنجێك ده‌رباره‌ی كتێبی په‌نجه‌كان یه‌كتری ئه‌شكێنن ـ ١٩٩٨.
- ئه‌و هۆكارانه‌ی مه‌سه‌له‌ی كورد پێك دێنن ـ بێ ساڵ، وه‌رگێران.
- ئه‌مڕۆ نه‌ك سبه‌ی ـ ٢٠٠٤.
- الارهاب الدولي في ضوء قرارا مجلس الأمن ١٣٧٣.
سه‌رچاوه:
- ئه‌رشیفی ده‌سته‌ی ئینسكلۆپیدیای پارتی دیموكراتی كوردستان.
