خالید مەحمود شێخۆ سڵێمان، ساڵی ١٩٦٣ لە گوندی شێخان ناحیەى مەزنێ قەزای مێرگەسوور پارێزگاى هەولێر لەدایکبووە. ساڵی ١٩٧٥ دواى نسکۆى شۆڕشی ئەیلوول (١٩٦١- ١٩٧٥) ئاوارەی ئێران بووە و لە ئۆردوگاى زێوە نیشتەجێ بووە، خێزاندارە. ساڵى ١٩٩١ گەڕاوەتەوە باشوورى کوردستان و بەشدارى ڕاپەڕینى کردووە.
ساڵی ١٩٧٨ پەیوەندى بە هێزى پێشمەرگەى شۆڕشی گوڵان کردووەو لەگەڵ حەمید ئەفەندی بۆتە پێشمەرگە. لەگەڵ مەفرەزەی حەمید خەلانی گەڕاوەتەوە دەڤەری خەلان، لێلۆک، مێرگەسوور و سیدەکان بەشداریی لە شەڕەکاندا کردووە. ساڵى ١٩٧٩ لەشەڕى کانییەڕەش بریندار بووە.
ساڵی ١٩٨٠ سەرەتای هەڵگیرسانی شەڕی عێراق- ئێران، لەگەڵ دکتۆر سەعید ئەحمەد و حەسۆ کانیەلنجی چووەتە ناوچەی هێزی بارزان لە حەیات و دەشتی بەرازگر و دواتر لەگەڵ ئیدریس بارزانی و شێخ محەمەد خالید لە ناوچەی کەتینە جێگیر بووە. لەگەڵ مەفرەزە ٦٣ پێشمەرگەیەکەى باوکى بەشداریی شەڕی مێرگەسوور و شەڕی خواکوڕکی کردووە.
ساڵی ١٩٨٩ لەگەڵ باوکی و هێزێکى پێشمەرگە گەڕاوەتەوە بۆ گەلی ڕەش لە ناوچەی برادۆست و بۆ ماوەی شەش مانگ سەرقاڵی کاری ڕێکخستنی نهێنی و کۆکردنەوەی زانیاریی هەواڵگری بووە لەسەر هێزەکانی دوژمن.
ساڵی ١٩٩١ پێش دەستپێکردنی ڕاپەڕین گەڕاوەتەوە ناوچەی سۆران. دوای شەڕی کۆڕێ، سەرلەنوێ لەگەڵ حەمید ئەفەندی خزمەتی کردووە و پاشان لە سەربازگەی بادلیان لە دیانا جێگیر بووە، دواتر گوارزاوەتەوە فەرماندەیی بارزان و بۆتە بەرپرسی هەواڵگریی فەرماندەیی بارزان بە پلەی عەقید، دواتر بۆتە ئەندامى فەرماندەیی بارزان و جێگرى فەرماندەی فەراماندەیی بارزان. بەشدارى شەڕەکانى بەرگرییکردنى لە حکومەتى هەرێم کردووە و ساڵى ١٩٩٦ لە سنوورى کەسنەزان لە شەڕى ناوخۆ بریندار بووە.
لە ڕۆژی ١٥ی کانوونی یەکەمی ٢٠١٠، لە کۆنگرەی ١٣ی پارتی دیموکراتی کوردستان، بەهۆی خزمەتەکانى کە بە کورد و کوردستانی کردوون، لەلایەن سەرۆک مەسعود بارزانی میدالیای بارزانی نەمری پێ بەخشراوە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
