حاجی ڕەمەزان محەمەد عەلی ناسراو بە (حجی خەنجەر)، ساڵی ١٩٥٢ لە گوندی شکەفتێ سەربە قەزای ئامێدی لەدایکبووە، محەمەد عەلی باپیری لەگەڵ لەشکری شەهید شیخ عەبدولسەلام، بەشداری شۆڕشی و ڕاپەرینەکانی ئەو دەمی لە دژی داگیرکەران کردووە و شەهید بووە، ساڵی ١٩٦٥ و لە تەمەنی منداڵی پەیوەندی بە هێزی پێشمەرگەی شۆڕشی ئەیلوول دەکات لەگەڵ هێزی حسۆ ژاژوکی تا ساڵی ١٩٦٧ و لەو ساڵە گواستراوتەوە هێزی شێخان لەگەڵ ئەحمەد میرخان ئاغا، ساڵی ١٩٦٩ بەشداری لەشەڕی ئەلێلێ دەکات، لەو شەڕە بریندار بووە، ساڵی ١٩٧٢ دەبێتە جێگری ئامیر فەسیل لە هێزی شێخان، ساڵی ١٩٧٤ بەشداری شەڕی گەرۆی عومەر ئاغا دەکات، ساڵی ١٩٧٥ و دوای نسکۆی شۆڕشی ئەیلوول ئاوارەی وەڵاتی تورکیا بووە، ساڵی ١٩٧٦ پەیوەندی بە سەرکردایەتی کاتی پارتی دیموکراتی کوردستان دەکات و دەچێتە لای سەلیمی قیادە(جوهر نامیق سالم) و کەریم شنگاری و دەبێتەوە بەرپرسی شانەی سەرەکی لە نێو هێزی پێشمەرگەی شۆڕشی گوڵان، لە هەمان ساڵدا بەشداری شەڕی باخێرێ دەکات و لەو شەڕە بە سوکی بریندار دەبێت، یەکێک لەو پێشمەرگانەیە بەشداری شەڕی مانەوەی پارتی لە هەکاری و گەلێ بازێ و شەڕەکانی تری ساڵی ١٩٧٨ دەکات و لە شەڕی گەلێ بازێ لە هەکاری بریندار بووە.
ساڵی ١٩٧٩ ئاوارەی وڵاتی ئێران دەبێت و لە هێزی عەبدوڵڵا قادۆ محەمەد زێباری پلەی ئامێر سریەی پێدراوە کە ئەو کات ئەرکی پاراستنی مەکتەبی سیاسی و سەرۆک مەسعود بارزانیان لە ئەستۆ بوو، لە ١٩ی تشرینی دوومی ١٩٨٠ بەشداری شەڕی یەکەمی حاجی ئومەران دەکات، ساڵی ١٩٨١ دەگەڕێتەوە ناوچە ئازادکراوەکانی باشووری کوردستان و لە شەڕەکانی باکورمان، شەرمن، شۆش، سەری چیای گارە بەشدار بووە، لە ساڵی ب١٩٨بەشداری شەڕی مەزنی مێرگەسۆر، شەڕی سیانا گەرە، شەڕی بامەرنێ بووە، ساڵی ١٩٨٨ لە دەستەی چواردە کەسی هێزی لێژنەی ناوچەی ئاکرێ بوو کە لە کاتی پرۆسەی ئەنفال لە ناوچەکە ماوتەوە دوای سێ مانگ توانیان خۆیان لەو گەمارۆی سەربازییەی سوپای عێراق و بەکرێگیراو و جاشەکان دەرباز بکەن.
لەگەڵ دەسپێکی پرۆسەی ئازادی عێراق و جەنگی یەکەمی کەنداو کە بە گەردەلۆلی بەیابان ناسراوە، دەگەڕێتەوە ناوچەکە و بەشداری سەرهەڵدانی ناوچەى ئاکرێ دەکات و لەشەڕەکانی ئاکرێ، بەردەڕەش کانیلان، دووبەردان و ناحییەی باشیک بەشداری دەکات، ساڵی ١٩٩١ بووتە بەرپرسی ڕێکخراو و لە هێزی مەقلوب کە عەبدوڵڵا قادۆ ئامێر هێز بوو دەبێتە ئامیر بەتالیۆن، ساڵی ١٩٩٦ لە ناوەڕاستی شەڕی نێوخۆیی یەکێتی لە دژی پارتی (١٩٩٤- ١٩٩٨) بووتە بەرپرسی بەشی عەسکەری (سەربازی) لێژنەی ناوچەی ئاکرێ، ساڵی ١٩٩٧ بووتە بەرپرسی ئەندامی بەشی عەسکەری لقی نۆی پارتی لە ساڵی ٢٠٠٢ و بە فەرمانی سەرۆک بارزانی کراوە بە ئەندامی دەزگای باڵای ئەیلوول لە پارێزگای دهۆک، ساڵی ٢٠٠٤ لەگەڵ دامەزراندنی دەزگای ئەیلوول لە ئاکرێ بووەتە جێگری بەرپرسی ئەو دەزگایە، لە درێژایی تەمەنی پێنج جار بریندار بووە، لە کۆنگرەی چواردەیەمی پارتی دیموکراتی کوردستان لە ٣ی تشرینی دووەمی ٢٠٢٢ لە شاری دهۆک لەبەر ئەو خزمەت و خەباتەی لە ڕێگای ڕزگاری کورد و کوردستان و ڕێبازی پیرۆزی بارزانی بەجێگەیاندبوو لە لایەن سەرۆک مەسعود بارزانی بە بەخشینی مەدالیای بارزانی خەڵات کرا.
سەرچاوە:
١- ئەرشیفی دەستەی ئینسکلۆپیدیای پارتی دیموکراتی کوردستان.
