ژیاننامە
ئەسکەندەر عەلی ڕەزا عومەر لە ساڵی ١٩٥٤ لە گوندی ئاشۆکانی سەربە دەڤەری بەڕانەتی پارێزگای هەولێر لە دایکبووە، گوندنشین بووە و سەرقاڵی کاری جوتیاری بووە، لە دوای نسکۆی شۆڕشی ئەیلوول تەواوی بنەماڵەکەی ئاوارەی وڵاتی ئێران بوونە و تا ساڵی ١٩٩١ دەرفەتی گەڕانەوەیان نەبووە و لە شارۆچکەی خانێ نیشتەجێ بوونە، شەهید ئەسکەندەر عەلی خاوەنی پێنج برای شەهیدە بەناوەکانی شەهید ئەکرەم عەلی ڕەزا لە ساڵی ١٩٧٤، شەهید فەرهاد عەلی ڕەزا لە ساڵی ١٩٨٣، شەهید تەڵعەت عەلی ڕەزا لە ساڵی ١٩٨٨، شەهید فەتاح عەلی ڕەزا لە ساڵی ١٩٨٨ و شەهید ڕەزاق عەلی ڕەزا لە ساڵی ١٩٨٨ خێزاندار بووە و خێزانی ناوی ساریە مامەند لەشکری بووە و خاوەنی یەک کوڕ و دوو کچ بووە بەناوەکانی کەمال، نەجیبە و غەریبە.
خەباتنامە
شەهید ئەسکەندەر عەلی لە ساڵی ١٩٦٩ بۆتە پێشمەرگە لە پەلی عەلی ڕەزای باوکی لە حاجی ئۆمەران، ئەم پەلە لە ساڵی ١٩٦١ دامەزراوە و ڕاستەوخۆ پەیوەندیان لەگەڵ بارەگای بارزانی هەبووە و بارەگایان لە دەڤەری بارزان و حاجی ئۆمەران بووە، لە ساڵی ١٩٧٤ بەهۆی بۆمبارانی فڕۆکەی ڕژێمی ئەوکاتی عێراق لە دەڤەری گەڵاڵە بریندار بووە.
لە دوای نسکۆی شۆڕشی ئەیلوول و ئاوارەیان لە وڵاتی ئێران شەهید ئەسکەندەر عەلی و بنەماڵەکەی چەکیان دانەناوە و بەردەوام بوونە لە خەباتی چەکداری خۆیان، دوای بەستنی کۆنگرەی نۆیەمی پارتی دیموکراتی کوردستان لە ساڵی ١٩٧٩ و دامەزراندنی لقی دووی پارتی دیموکراتی کوردستان، پەلەکەی عەلی ڕەزا کە شەهید فەرهاد عەلی سەرپەلی بوو، کرانە مەفرەزەی پارتیزانی لقی دووی پارتی دیموکراتی کوردستان و شەهید ئەسکەندەر عەلی تێیدا بەردەوامی بە خەباتی خۆی داوە.
لە مانگی ٦ی ١٩٨٢ ئەسکەندەر عەلی و دەستەیەک لە هاوسەنگەرانی ویستوویانە بۆ ئەنجامدانی چالاکیەکی پارتیزانی بچنە دەشتی قەراج و کەندێناوە، بەڵام کە گەشتوونەتە نزیک گوندی قۆریتانی سەربە پارێزگای هەولێر، کەوتوونەتە بۆسەی سەرباز و جاشی ڕژێمی بەعس و ڕووبەڕوویان بوونەتەوە، دوای ڕووبەڕووبوونەوەیەکی دوو کاتژمێری لە ئەنجامدا ئەسکەندەر عەلی و بەشێک لە هاوسەنگەرانی بە برینداری دەستگیر کراون و گوازراونەوەتەوە بۆ شاری بەغدا و دادگای سەورەی بەغدا سزای لە سێدارەدانی سەربازی فیشەک باران بۆ ئەسکەندەر عەلی و برایەکی بەناوی فەرهاد عەلی ڕەزا و کوڕەخاڵێکی بەناوی ئیسماعیل عەوڵا حەمەد دەرکردووە، لە ڕێکەوتی ١ی کانوونی دووەمی ١٩٨٣ بڕیاری لە سێدارەدانەکەیان جێبەجی کراوە و هەرسێکیان شەهید بوونە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
