ساڵی ١٩٦٧ پەیوەندی بە هێزی پێشمەرگەی شۆڕشی ئەیلوول کردووە لە لقی باڵەک بۆتە پێشمەرگە، تا ساڵى ١٩٧٠ لەوێ بەردەوام بووە لە ئەرکى پێشمەرگایەتى. ساڵی ١٩٧٠ لە لێژنە ناوچەی باڵەک لەگەڵ محمەدئەمین ڕەشکە بووە، دوای ڕێککەوتی ١١ی ئازاری ساڵی ١٩٧٠ کراوە بە پاسەوانی سنوور لە دەڤەری ڕەواندز، ساڵى ١٩٧٤ دوای دەستپێکردنەوەی شەڕ لەنێوان حکومەت و هێزى پێشمەرگەى شۆڕشی ئەیلوول، ئەحمەد بڕنۆ گەڕاوەتەوە بۆ ڕیزەکانی پێشمەرگەی هێزی کارۆخ بە فەرماندەیی سەید سەلیم، دواتر گواستراوەتەوە بۆ قەسرێ و بەردە زەرد لەنزیک گوندی ڕایات و کراوە بە پاسەوانی بارەگای بارزانی.
ساڵى ١٩٧٦ دوای هەڵگیرسانی شۆڕشی گوڵان چووەتە شاری کەرەج و چاوی بە ئیدریس بارزانی کەوتووە، دواتر لەگەڵ عەریف ئەحمەد و محەمەد ڕواندزی و مستەفا ئەلیاس پەیوەندییان بە هێزى پێشمەرگە بە فەرماندەیی هەریەکە لە مولازم یونس ڕۆژبەیانی و حەمید ئەفەندی لە دەڤەری سیدەکان کردووە، لەبنکەی گەلی گۆستا لەپشت دەشتی بەرازگری ناحیەى سیدەکانى سەر بە پارێزگاى هەولێر لەگەڵ حەمید ئەفەندی بووە، دواتر بنکەکەیان گواستراوەتەوە بۆ بێرکم لەدەڤەری سیدەکان.
ساڵى ١٩٩١ دوای ڕاپەڕینى خەڵکى باشووری کوردستان، ئەحمەد بڕنۆ لە دەڤەری سیدەکان بووە و دواتر لەگەڵ حەمید ئەفەندی و نیهاد بارزانی بنکەکەیان گواستۆتەوە بۆ ناوچەی پەیمان لە پیرمام و دواتر بۆ یەکەی ٤٣ی فەرماندەیی هەڵگورد لە سۆران دەگوازرێتەوە.
ئەحمەد بڕنۆ لەژیانی پێشمەرگایەتیدا لەچەندین شەڕدا بەشدار بووە، وەکو شەڕی کۆڕەک، شەڕی سەرچیا، شەڕی چیای پیران، شەڕی سیدەکان و ساڵى ١٩٨٨ داستانی خواکوڕک و جارێکیش بریندار بووە، لە ٢٨ی ئایاری٢٠١٣ لەلایەن سەرۆک بارزانی مەدالیای بارزانی پێ بەخشرا. لە ٣ی ئابی ساڵی ٢٠١٩ بەهۆی نەخۆشیەوە کۆچی دوایی کرد و لە گۆڕستانى دیانا بەخاک سپێردرا.
سەرچاوە:
١.ئەرشیفى دەستەى ئینسکلۆپیدیاى پارتى دیموکراتى کوردستان.
