ژیاننامە
فەیزۆ سەلیم خان سەعدۆڵا، ناسراوە بە فەیزۆ زێباری، ساڵی ١٩٣٩ لە گوندی بیرە کەپرا لە دایکبووە، لە ساڵی ١٩٤٥ لە تەمەنی ٦ ساڵیدا لەگەڵ بنەماڵەکەی ئاوارەی ڕۆژهەڵاتی کوردستان بوونە و لەگەڵ هەڤاڵانی بارزانی نەمردا بەشداری پاراستنی کۆماری کوردستانی لە مەهاباد کردووە، دوای تێکچوونی کۆماری کوردستان لە مەهاباد دەگەڕێنەوە کوردستان، پەیوەندی بە ڕیزەکانی شۆڕشی ئەیلوول دەکات و دوای نسکۆی شۆڕشی ئەیلوول ئاوارەی ئێران دەبێتەوە و لە شاری نەغەدە نیشتەجێ دەبێت، خوێندەوار بووە، خاوەن پێنج کوڕ و چوار کچ بوو، شارەزای زمانی عەرەبی و فارسی بووە.
خەباتنامە
فەیزۆ سەلیم خان سەعدۆڵا، لە دەڤەری بادینان چالاکانە لە ناو ڕێکخراوەکانی حزبی و ڕێکخستنەکان کاری پارتایەتی ئەنجام دەدات، دواتر پەیوەندی بە ڕیزەکانی شۆڕشی ئەیلوول دەکات و دەبێتە پێشمەرگە، ساڵی ١٩٧٠ دەبێتە فەرماندەی بەتالیۆنی ٢ی هێزی ئاکرێ و وەک پێشمەرگە و فەرماندە بەشداری چەندها شەڕ وەک شەڕی هەزار جووت، شەڕی سماقۆک، شەڕی کەرەتوبا ده‌كات.
ساڵی ١٩٧٥دوای نسکۆی شۆڕشی ئەیلوول ئاوارەی ئێران دەبێت و بەشداری شۆڕشی گوڵان دەکات و دەبێتە فەرماندەی هێز، دوای کۆنگرەی ٩ی پارتی دیموکراتی کوردستان بە بڕیاری سەرکردایەتی پارتی دەبێتە فەرماندەی بارەگای مەکتەبی سیاسی لە ڕاژان، دواتر بە بڕیاری سەرکردایەتی پارتی و مەکتەبی سیاسی شەهیدی فەرماندە فەیزۆ زێباری دەگوازرێتەوە سنووری لقی ٣و٤ لە پشت چیای ئەزکەل و لەو دەڤەرەش بەشداری چەندین داستانی بەناوبانگ دەکات لەوان شەڕی بانەدار.
لە رۆژی١٧ لەسەر ١٨ی تشرینی دووەمی١٩٨٠ کە دەگوازرانەوە بۆ حاجی ئومەران لەگەڵ ٦ پێشمه‌رگه‌ی تر بە ناوەکانی شەهید سلێمان چاربوتی، شەهید تێلی خەسرەو زێباری، شەهید شاکر عەزیز زێباری، شەهید محەمەد سورچی، شەهید مەلا رەسول بەەکارەیی و شەهید عەبدولقادر بەرەکاریی بە سەر مینی دوژمن دەکەون و شەهید دەبن.
سه‌رچاوه‌کان:
-پارتی دیموکراتی کوردستان، مەکتەبی سیاسی، ئەرشیڤی مەکتەبی سیاسی، شەهیدانی شۆڕشی گوڵان ساڵی ١٩٨٠ز، ل٤٩.
- سەفەر یوسف میرخان ژاژوکی، ئافرەت و تێکوشان بەشێک لە سەروەریەکانی خەباتی پێشمەرگایەتی، ٢٠١٥، ل١٤٠-١٤٦.
