فەتاح گولی

ئەبابەکر عوسمان محەمەد ناسراو بە (فەتاح گولی)، ساڵی ١٩٤٣ لە پارێزگای دهۆک لەدایکبووە، ساڵى ١٩٦١ پەیوەندی بە هێزى پێشمەرگەى شۆڕشى ئەیلوول کردووە، ساڵى ١٩٧٥ دوای نسکۆی شۆڕشی ئەیلوول ئاوارەى وڵاتى ئێران بووە، ساڵی ١٩٧٩ پەیوەندی بە شۆڕشی گوڵانەوە دەکات، لە ١٦ی ئابی ١٩٩٦ لە یۆبیلی زێڕینی پارتی دیموکراتی کوردستان لەلایەن سەرۆک مەسعود بارزانی مەدالیای بارزانی پێ بەخشراوە. ساڵی ٢٠٠٧ بەهۆی نەخۆشیەوە کۆچی دوایی کردووە.


فەتاح گولی لە ساڵی ١٩٤٣ لەشارۆچکەی باتیفای سەربە قەزای زاخۆ پارێزگای دهۆک لەدایک بووە، ساڵی ١٩٦١ قۆناغی ناوەندی لە زاخۆ تەواو کردووە، ساڵى ١٩٧٥ دوای نسکۆی شۆڕشی ئەیلوول ئاوارەى وڵاتى ئێران بووە و لە شاری نەغەدەی ڕۆژهەڵاتی کوردستان نیشتەجێ بووە، دواتر گواستراوەتەوە بۆ کۆمەڵگای ڕەبەت و لەوێشەوە بۆ کۆمەڵگای سەراو نیلوفەر لە کرماشان و لەوێشەوە گواستراوەتەوە بۆ کرمان، ساڵی ١٩٧٩ گەڕاوەتەوە زێوە و تاکو بەستنی کۆنگرەی نۆیەمی پارتی دیموكراتی كوردستان  لەوێ پێشمەرگە بووە. لە ڕۆژی ٢٤ی حوزەیرانی ساڵی ٢٠٠٧ بەهۆی نەخۆشیەوە کۆچی دوایی کرد و لە زێدی خۆی لە شارۆچکەی باتیفا بەخاک سپێردراوە.

ساڵی ١٩٥٩ پەیوەندی کردووە بە ڕیزەکانی یەکێتی قوتابیانی کوردستان، ساڵى ١٩٦١ پەیوەندی بە هێزى پێشمەرگەى شۆڕشى ئەیلوول کردووە و لە بەتالیۆنی عەلی هالۆ بۆتە پێشمەرگە، ساڵی ١٩٦٤ کراوە بە کادیری بەتالیۆن، ساڵی ١٩٦٨ گواستراوەتەوە بۆ هێزی هەڵگورد کە هێزێکی دەستوەشێن بووە بە فەرماندەیی سلێمان حاجی بەدری لە ناوچەکانی قەسرێ و حاجی ئۆمەران و ئەرکی ئیدارەی هێزەکەی پێ سپێردراوە، تا ساڵى ١٩٧٥ لەو هێزە بووە.

ساڵی ١٩٨٠ کراوەتە بە بەرپرسی لێژنەی ناوچەی زاخۆ لە لقی یەک، ساڵی ١٩٨١ گواستراوەتەوە بۆ ناوچەی دهۆک، ساڵی ١٩٨٥ کراوە بە بەرپرسی لێژنەی ناوچەی ئامێدی، ساڵی ١٩٨٦ ئەرکی بەرپرسیارێتی لێژنەی ناوچەی دهۆکی پێ سپێردراوە و ساڵی ١٩٨٧ کراوە بە بەرپرسی لێژنەی ناوچەی شێخان. ساڵى ١٩٨٨ دوای شاڵاوە بەدناوەکەی ئەنفال و کیمیاباران کردنی دەڤەری بادینان، ئەبابەکر عوسمان محەمەد لەگەڵ کۆمەڵێک هەڤاڵی تر چووەتە دەڤەری دۆسکی ژوورو لەوێ ماوەتەوە.

ساڵى ١٩٩١ دوای ڕاپەڕینی باشووری کوردستان گەڕاوەتەوە بۆ باشووری کوردستان و لەشارى دهۆک ئاکنجی بووە، ساڵی ١٩٩٢ کراوە بە بەرپرسی بەرەی کوردستانی لە دەڤەری دهۆک و هاوکات بەرپرسی لێژنەی ناوچەی دهۆک بووە، لەکۆتایی هەمان ساڵ کراوە بە فەرماندەی لەشکری یەکی زاخۆ، ساڵی ١٩٩٣ کراوە بە کارگێڕی لقی یەک و بەرپرسی بەشی سەربازی لق بووە، ساڵی ١٩٩٥ کراوە بە فەرماندەی هێزی زێرەڤانی لەدهۆک. ساڵی ١٩٩٩ یەکێک بووە لەئەندامانی شاندی پارتی کە لەلایەن وڵاتی سعودیە بانگهێشت کرابوون و بەشداری ڕێوڕەسمی حەجیان کرد. لەساڵی ٢٠٠١ و دوای دامەزراندنی لقی هەشت لەزاخۆ، فەتاح گولی ئەرکی جێگری بەرپرسی لقی پێ سپێردرا.

ناوبراو لە ژیانی پێشمەرگایەتیدا بەشداری چەندین شەڕی کردووە لەوانە، شەڕی هەسن پیرکا لەساڵی ١٩٨٠، شەڕی گەلی دهۆک لەساڵی ١٩٨٢، شەڕی گەلی زاویتە لەساڵی ١٩٨٢، شەڕی دێرگژینگ لەساڵی ١٩٨٤، شەڕی سوتکێ لەساڵی ١٩٨٧، داستانی خواکوڕک لەساڵی ١٩٨٨.

لە ١٦ی ئابی ١٩٩٦ لە یۆبیلی زێڕینی پارتی دیموکراتی کوردستان بەهۆی ئەو خزمەتانەی پێشکەشی کورد و کوردستان و ڕێبازی بارزانی کردووە، لەلایەن سەرۆک مەسعود بارزانی مەدالیای بارزانی پێ بەخشراوە.


سەرچاوە:

١-ئەرشیفى دەستەى ئینسکلۆپیدیاى پارتى دیموکراتى کوردستان.

 


بابەتی پەیوەندیدار

فەقێ ئەحمەد پشدەری

ئەحمەد محەمەد ئەبوبەکر، ناسراو بە (فەقێ ئەحمەد پشدەرى)، ساڵى ١٩٢٢ لە گوندى دەلگە لە ناوچەى پشدەر لە ناحیەى هێرۆ سەر بە قەزاى قەڵادزێ پارێزگاى سلێمانى لە دایک بووە، ساڵى ١٩٥٨ پەیوەندى بە ڕیزەکانى پارتى دیموکراتى کوردستان کردووە، ساڵى ١٩٦١ پەیوەندى بە هێزی پێشمەرگەى شۆڕشی ئەیلوول کردووە، ساڵى ١٩٧٥ دوای نسکۆی شۆڕشی ئەیلوول (١٩٦١- ١٩٧٥) ئاوارەى وڵاتى ئێران بووە، لە ٤ى تشرینى یەکەمى ١٩٧٩ وەک ئەندامى کۆنگرە بەشدارى لە کۆنگرەى نۆیەمى پارتى دیموکراتى کوردستانی لە ڕۆژهەڵاتی کوردستانی کردووە.

زانیاری زیاتر

خالید تەها عەلی

خالید تەھا عەلی ساڵی ١٩٤٥ لە پارێزگای دھـۆک لەدایـــــک بـــــووە. ڕۆژی ٤ی نیسانی١٩٦٢ پەیوەندی بە شۆڕشی ئەیلوولەوە کردووە، ساڵی ١٩٧٠ بووەتەسکرتێری سەندیکای کرێکـارانی دھـۆک، دوای نسکۆی شۆرشی ئەیلوول لەساڵی ١٩٧٥ئاوارەی رۆژهەڵاتی کوردستان، لەساڵی ١٩٨٩ چووەتە وڵاتی نەمسا، ساڵی ١٩٩٩ گەراوەتەوە بۆ کوردستان، لە رۆژی ١٥ی کانونی یەکەمی ٢٠١٠ میدالیای بارزانی پێ بەخشراوە.

زانیاری زیاتر

حەمید حەیدەر ئەرگوشی

حەمیـد حەیـدەر ئەحمەد، ناسراو بە (حەمید ئەرگۆشى)، لە دایک بووی گوندى ئەرگۆشى ناحیەى شێروان مەزنە، ساڵى ١٩٥٩ پەیوەندى بە ڕیزەکانى پـارتی دیمـوکراتی کوردسـتان کردووە، ساڵى ١٩٦١ پەیوەندى بەهێزى پێشمەرگەى شۆڕشی ئەیلوول کردووە و بۆتە پێشمەرگە. ساڵی ١٩٧٩ پەیوەندی بە هێزى پێشمەرگەى شۆڕشی گوڵان کردووە، لە ١٥ی کانونی یەکەمی ٢٠١٠ میدالیای بارزانی پێ بەخشراوە.

زانیاری زیاتر

خەمەد بارزانى

خەمەد میـــرحەمەد فەتـــاح، ناسراو بە (خەمەد بارزانى)، ساڵى ١٩٤٩ لە ناحیەى گۆڕەتووی قەزاى مێرگەسۆر لەدایک بووە، ساڵى ١٩٧٢ پەیوەندى بەهێزى پێشمەرگەى شۆڕشی ئەیلوول کردووە، ساڵى ١٩٧٤ گوازراوەتە بۆ هێزى کاوەى لەشکرى کوردستان، ساڵى ١٩٧٧ لەلایەن هەواڵگرى ڕژێمى عێراق دەستگیرکراوە، لە ١٥ی کانوونى یەکەمى ٢٠١٠ لە کۆنگرى ١٣ى پارتی دیموکراتی کوردستان، میدالیای بارزانی پێ بەخشراوە

زانیاری زیاتر

جەوهەر ئاغاى غەفور ئاغاى لێوژە

جەوهەر غەفور ئیسماعیل، ناسراو بە (جەوهەر ئاغاى غەفور ئاغاى لێوژە)، ساڵى ١٩٢٨ لە گوندی لێوژە لە ناحیەى ناودەشت لە قەزاى قەڵادزێ سەر بە پارێزگاى سلێمانى لە دایک بووە، ساڵى ١٩٦١ پەیوەندى بە هێزى پێشمەرگەى شۆڕشی ئەیلوول کردووە، ساڵى ١٩٧٦ پەیوەندى بە هێزى پێشمەرگەى شۆڕشی گوڵان کردووەتەوە، لە ١٦ى ئابى ١٩٩٦ لە یۆبیلى زێڕینى پارتى دیموکراتى کوردستان، میدالیاى بارزانى پێ بەخشراوە.

زانیاری زیاتر