ژیاننامە
فەتاح عەلی ڕەزا عومەر لە ساڵی ١٩٦٢ لە گوندی ئاشۆکانی سەربە دەڤەری بەڕانەتی پارێزگای هەولێر لە دایکبووە، گوندنشین بووە و سەرقاڵی کاری جوتیاری بووە، ئاستی خوێندەواری سەرەتایی بووە، لە دوای نسکۆی شۆڕشی ئەیلوول تەواوی بنەماڵەکەی ئاوارەی وڵاتی ئێران بوونە و تا ساڵی ١٩٩١ دەرفەتی گەڕانەوەیان نەبووە و لە شاری نەغەدە نیشتەجێ بووە، شەهید فەتاح عەلی خاوەنی پێنج برای شەهیدە بەناوەکانی شەهید ئەکرەم عەلی ڕەزا لە ساڵی ١٩٧٤، شەهید ئەسکەندەر عەلی ڕەزا لە ساڵی ١٩٨٣، شەهید فەرهاد عەلی ڕەزا لە ساڵی ١٩٨٣، شەهید تەلعەت عەلی ڕەزا لە ساڵی ١٩٨٨ و شەهید ڕەزاق عەلی ڕەزا لە ساڵی ١٩٨٨. فەتاح عەلی خێزاندار بووە و خێزانی ناوی نەرمین نادر بووە و خاوەنی یەک کوڕ و سێ کچ بووە بەناوەکانی قابیل، زارا، ساکار و ئارەزو.
خەباتنامە
شەهید فەتاح عەلی لە ساڵی ١٩٨٠ بۆتە پێشمەرگە لە مەفرەزەی پارتیزانی لقی دووی پارتی دیموکراتی کوردستان، کە لەوکاتەدا شەهید فەرهاد عەلی برای فەرماندەی مەفرەزەکە بووە، لە ساڵی ١٩٨٢ لە حاجی ئۆمەران لە ڕووبەڕووبوونەوەی سەربازانی ڕژێمی بەعس فیشەک بەر ڕانی ڕاستی کەوتووە و بریندار بووە، لە ساڵی ١٩٨٣ دوای شەهیدبوونی فەرهاد عەلی برای، لە شوێنی ئەو سەرپەرشتی مەفرەزە پارتیزانیەکەی کردووە و بەردەوامیان بە خەباتی خۆیان داوە تا ساڵی ١٩٨٦ بە فەرمی فەرمانی بوون بە فەرماندەی مەفرەزەی بۆ هاتۆتەوە.
لە ڕێکەوتی ١٦ی ئایاری ١٩٨٨ شەهید فەتاح عەلی و شەش هاوسەنگەری بەناوەکانی شەهید تەلعەت عەلی ڕەزا، شەهید ڕەزاق عەلی ڕەزا، شەهید مەحەمەد ڕەن و شەهید خەلیل دەچنە سەر ڕێگەی کاروانێکی سەربازی ڕژێمی بەعس کە بۆ ئەنفالکردنی چەند گوندێک ڕوویان لەو دەڤەرە کردووە، دوابەدوای یەک کاتژمێر لە ڕووبەڕووبوونەوەی هێزەکەی بەعس و ڕێگری لێیان، لە ئەنجامدا هەر حەوت پێشمەرگەکە بێ سەروشوێن بوونە و هیچ سۆراغێکیان نیە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
