شەهید عەباس محێدین ناسراوە بە عەباس کەردزی، لە ساڵی ١٩٣٤ لە گوندی کەردزی سەربە ناحیەی قوشتەپەی پارێزگای هەولێر لە دایکبووە، گوندنشین بووە و سەرقاڵی کاری جوتیاری بووە، ئاستی خوێندەواری سەرتایی بووە، عەباس کەردزی خێزاندار بووە و خێزانی ناوی سافیە خزر بووە و خاوەنی یەک کوڕ بووە بەناوی ئەحمەد.
لە ساڵی ١٩٦١ بۆتە کادر لە لێژنەی ناوچەی جوتیارانی سەربە لقی دووی پارتی دیموکراتی کوردستان، لە ساڵی ١٩٦٣ پەیوەندی بە شۆڕشی ئەیلوولەوە دەکات و دەبێتە پێشمەرگە لە بەتالیۆنی سەید کاکە سەربە هێزی دەشتی هەولێری پارتی دیموکراتی کوردستان. بەشداری شەڕی بنکەی پۆلیسی قوشتەپە، شەڕی ڕشکن، شەڕی ڕاوەدوونان بەکرەجۆ، دوو شەڕی نزیک لە گوندی کەردز، سێ جار لە شەڕی چواردەوری گوندی کەر زۆڕی، شەڕی بێستانە، شەڕی سەری بەردی کردووە. لە ساڵی ١٩٦٦ لە شەڕی گوندی بێستانەی سنووری پارێزگای هەولێر فیشەکی سەربازی ئەوکاتی عێراقی بەرکەوتووە و بریندار بووە.
لە شوباتی ١٩٦٩ لە ڕووبەڕووبوونەوەی سەربازی ئەوکاتی عێراق، عەباس کەردزی فیشەکی بەرکەوتووە و شەهید بووە، دواتر هاوسەنگەرانی دەیگوازنەوە گوندی دووکەرە و لە گۆڕستانی گوندەکە بە خاکیان سپاردووە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
