ژیاننامه
دڵشاد شه‌هاب ساڵی ١٩٧٢ لەدایکبووه، ساڵی ١٩٧٨ له‌لایه‌ن ڕژێمی به‌عسه‌وه له‌گه‌ڵ خێزانه‌كه‌ی له زێدی خۆیان ده‌ركراون و له كۆمه‌ڵگای هه‌ریر نیشته‌جێ كراون، ساڵی ١٩٨٣ باپیر و باوكی له‌لایه‌ن ڕژێمی به‌عسه‌وه ئه‌نفال كراون، به‌شی ئه‌ندازیاریی شارستانی لە زانكۆی سه‌ڵاحه‌دین تەواوکردووە، لە ساڵی ٢٠٠٩ بووەتە ئەندامی خولی سێیەمی ئه‌نجوومه‌نی نیشتیمانی كوردستان و ساڵی ٢٠١٢ و له كابینه‌ی حه‌وته‌مدا بووەته وه‌زیری شاره‌وانی و گه‌شتوگوزاری حكومه‌تی هه‌رێمی كوردستان شاره‌زای زمانه‌كانی كوردی و عه‌ره‌بییه.
خه‌باتنامه
دڵشاد شه‌هاب له ساڵی ١٩٩١ په‌یوه‌ندی به ڕیزه‌كانی یه‌كێتی قوتابیان و لاوانی دیموكراتی كوردستانه‌وه كردووه و ساڵی ١٩٩٣ و له کۆنگرەی هه‌شته‌‌‌مدا كه به كۆنگره‌ی ئازادی ناسراوه، به ئه‌ندامی لێژنه‌ی ڕاپه‌ڕاندنی یه‌كێتی قوتابیانی كوردستان هه‌ڵبژێردراوه و بووەتە به‌رپرسی لێژنه‌ی لقی زانكۆی سه‌ڵاحه‌دین، به‌رپرسی لێژنه‌ی ناوچه‌ی زانكۆ سه‌ر به لێژنه‌ی لقی دووی پارتی دیموكراتی كوردستان بووە و ساڵی ٢٠٠٤ به كارگێڕی لێژنه‌ی لقی دوو ده‌ستنیشان كراوه.
ساڵی ٢٠٠٩ بووەتە ئەندامی خولی سێیەمی ئه‌نجوومه‌نی نیشتیمانی كوردستان و كراوه‌ته ئه‌ندامی لێژنه‌ی ئاوه‌دانكردنه‌وه و نیشته‌جێكردن و هاوچه‌رخكردنی لادێ له ئه‌نجومه‌نی نیشتمانی كوردستان.
ساڵی ٢٠١٠ و له كۆنگره‌ی سێزدهیهمدا به ئه‌ندامی ئه‌نجومه‌نی سه‌ركردایه‌تی پارتی دیموكراتی كوردستان هه‌ڵبژێردراوه و دوو ساڵ پاشتر و له كابینه‌ی حه‌وته‌مدا بووەته وه‌زیری شاره‌وانی و گه‌شتوگوزاری حكومه‌تی هه‌رێمی كوردستان.
سه‌رچاوه‌كان:
- ئەرشیفی دەستەی ئینسکلوپیدیای پارتی دیموکراتی کوردستان.
- مێژووی پارتی دیموکراتی کوردستان، كۆنگره و كۆنفرانس (پرۆگرام و په‌یڕه‌وی ناوخۆ)، ده‌سته‌ی ئینسكلۆپیدیای پارتی دیموکراتی کوردستان، به‌رگی دووەم، (هه‌ولێر- چاپخانه‌ی رۆكسانا- ٢٠٢١).
- ئاماده‌كردن و كۆكردنه‌وه : تارا ته‌حسین ئه‌سعه‌دی، ئه‌ندامانی په‌رله‌مانی كوردستان خولی سێیه‌م ٢٠٠٩ ـ ٢٠١٣، (هه‌ولێر ـ چاپخانه‌ی شه‌هاب ـ ٢٠١٠ز).
- باوكی ئالها، پانۆرامای كۆنگره‌ی ئازادی، ڕۆژنامه‌ی پێشكه‌وتن، ئۆرگانی یه‌كێتی لاوانی دیموكراتی كوردستان، ژماره ٥٢، هه‌ولێر، تشرینی یه‌كه‌می ١٩٩٤ز.
- پاڵێوراوانی لیستی كوردستانی بۆ هه‌ڵبژاردنی ٢٥/٧/٢٠٠٩، گۆڤاری ده‌نگدان، ده‌زگای هه‌ڵبژاردنی (ی.ن.ك)، ژماره ٨، سلێمانی، ٢٠٠٩ز.
- ساسان عه‌ونی، یه‌كێتی قوتابیانی كوردستان چه‌ند لایه‌نێكی تێكوشان و مێژوو، (هه‌ولێر مه‌كته‌بی سكرتاریه‌تی یه‌كێتی قوتابیانی كوردستان ـ چاپخانه‌ی وه‌زاره‌تی په‌روه‌رده ـ ١٩٩٨ز).
- سیروان عثمان، مێژووێكی پرشنگدار و كاروانێكی نه‌پساوه، (هه‌ولێر ـ چاپخانه‌ی ڕۆشنبیری ـ ٢٠١٤ز).
- شه‌عبان عه‌لی شه‌عبان، هه‌ندێك زانیاری سیاسی و مێژوویی، چاپی سێیه‌م، (هه‌ولێر ـ چاپخانه‌ی ڕۆژهه‌ڵات ـ ٢٠١٣ز).
- عرفان عه‌زیز عه‌زیز، كۆنگره و كۆنفڕانسه‌كانی یه‌كێتی قوتابیانی كوردستان، (هه‌ولێر ـ پڕۆژه‌ی نووسینه‌وه‌ی مێژووی یه‌كێتی قوتابیانی كوردستان ـ چاپخانه‌ی ڕۆژهه‌ڵات ـ ٢٠١٢ز).
- لقی دوو، لقی دوو له نیوسه‌ده‌ی تێكۆشاندا، (هه‌ولێر ـ چاپخانه‌ی ئاراس ـ ٢٠١٠ز).
