خدر محەمەد خدر، هەر لە تەمەنى لاوێتیدا پەیوەندى بە ڕێکخستنەکانى پارتى دیموکراتى کوردستان دەکات و لەتەمەنى ١٦ ساڵى لەگەڵ فەرماندە مەمەدەڕەش ڕواندزى باوکى لە گوندى فەقیانى سەر بە قەزاى ڕواندز دەبێتە پێشمەرگە. ساڵى ١٩٧٦ دواى هەڵگیرسانى شۆڕشی گوڵان دووبارە پەیوەندى بەهێزى پێشمەرگەوە دەکات، لە هێزى ئاوارە دەبێتە پێشمەرگە، لە گوندەکانى خنێرە و لۆلانی دەڤەرى برادۆست ئەرکى پێشمەرگایەتى بینیوە، ساڵى ١٩٨٨ بەشدارى داستانی خواکوڕک دەکات.
ساڵى ١٩٩١ دواى گەڕانەوەى لە وڵاتى ئێران دووبارە لەگەڵ فەرماندە مەمەدەڕەش ڕواندزى باوکى دەبێتە پێشمەرگە، ماوەیەک بەرپرسی پاراستنی پردەکانی حافیز و پردی بێخاڵ و کاولۆکان بووە، ساڵی ١٩٩٢ لە دوای شەهیدبوونی باوکی لە شوێنی ئەو دەکرێتە ئامر هێزی هندرێن لە سنووری ڕواندز.
ساڵى ١٩٩٢ دواى پێکهێنانى لەشکرى یەکگرتووى کوردستان، پلەى سەربازى وەردەگرێت و لە فەوجى ڕواندز کە بارەگاى لە حامیەى ڕواندز دەبێت، دەبێتە جێگرى خەمەد بارزانى.
ساڵى ١٩٩٤ دواى هەڵگیرسانى شەڕى ناوخۆ، ئاوارە دەبێت و ماڵى دەباتە شارۆچکەى خەلیفان، شەوى ١٧ لەسەر ١٨ی تشرینى یەکەمى ١٩٩٦ لە کاتى هێرشى چەکدارانی یەکێتى نیشتمانی کوردستان بۆ سەر لێژنە ناوچەى ڕواندز شەهید دەبێت.
سەرچاوە:
١.ئەرشیفی دەستەی ئینسکلوپیدیای پارتی دیموکراتی کوردستان.
