شەهید خدر عەلی خدر، ناسراو بە خدری حاجی عەلی، ساڵی ١٩٣٨ لە گوندی هەمزە کۆری سەربە ناحیەی قوشتەپەی پارێزگای هەولێر لە دایکبووە، گوندنشین بووە و سەرقاڵی کاری جووتیاری بووە. تا قۆناغى سەرەتایی خوێندووە، خێزاندار بووە و خاوەنی دوو کوڕ و سێ کچ بووە، ساڵی ١٩٧٥ دواى نسکۆى شۆڕشى ئەیلوول ئاوارەی وڵاتی ئێران بووە و لە شاری مەهاباد و خانێ نیشتەجێ بووە، دوای گەڕانەوەی لە وڵاتی ئێران، ڕەوانەی خوارووی عێراق کراوە و لە ناحیەی گەرمەی سەربە قەزای ڕوومادی نیشتەجێ بووە تا ساڵی ١٩٧٩ گەڕاوەتەوە شاری هەولێر.
خدر حاجی عەلی، ساڵی ١٩٦٦ پەیوەندى بە هێزى پێشمەرگە شۆڕشی ئەیلوول کردووە و لە بەتالیۆنی ئەحمەدی حاجی عەلی برای کە سەربە هێزی دەشتی هەولێری پارتی دیموکراتی کوردستان بووە بۆتە پێشمەرگە. بەشداری شەڕی باوەجی و شەڕی چیای سەفینی کردووە.
ساڵی ١٩٧٤ لە شەڕی باوەجی دوای شەهیدبوونی هەردوو براکەی، بەهۆى تۆپبارانى تۆپخانەى سوپاى عێراق، بە سەختی بریندار بووە و ڕەوانەی وڵاتی ئێران کراوە، ماوەی چوار مانگ لە نەخۆشخانەی تاران بۆ وەرگرتی چارەسەری ماوەتەوە.
ساڵی ١٩٧٩ پەیوەندى بە هێزى پێشمەرگە شۆڕشی گوڵان کردووە و لە هێزی سەید کاکە بۆتە پێشمەرگە. ساڵی ١٩٧٩ و دوای یەک مانگ لە بوونەوەی بە پێشمەرگە، لەگەڵ ١٧ هاوسەنگەری چوونەتە گوندەکانی چوار دەوری بێستانە و کەردز بۆ ئەنجامدانی چالاکی پارتیزانى، لە گوندی شیوە پیران هێزێکی سەرباز و جاشی ڕژێمی ئەوکاتی عێراق گەمارۆیان داون، پێشمەرگەکان ڕووبەڕووی سوپاى عێراق بوونەتەوە، خدر حاجى شەهید و هاوسەنگەرەکانى شەهید بوونە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
