خالید حەمید ئاغا بیری، ساڵی ١٩٤٤ لە گوندی بیری لەدەڤەری دۆسکی سەروو سەربە قەزای ئامێدی پارێزگاى دهۆک لەدایک بووە، خێزاندار بووە، ساڵى ١٩٧٥دوای نسکۆی شۆڕشی ئەیلوول (١٩٦١- ١٩٧٥) ئاوارەى ولاتی ئێران بووە و سەرەتا لە شاری نەغەدەی ڕۆژهەڵاتی کوردستان و دواتر لە شاری کەرەج نیشتەجێ بووە، ساڵی ١٩٩١ دواى ڕاپەڕینى جەماوەرى بۆ باشووری کوردستان گەڕاوەتەوە نیشتمان. لە ٣٠ی ئایاری ٢٠١٢ کۆچی دوایی کردووە.
ساڵی ١٩٦١ پەیوەندى بە هێزى پێشمەرگەى شۆڕشی ئەیلوول (١٩٦١- ١٩٧٥) کردووە و لەلای حەمید ئاغای باوکی کە یەکێک بووە بۆتە پێشمەرگە، لەهەمان ساڵدا لەگەڵ بارزانی پەڕیوەتەوە بۆ دەڤەری مزووری و نێروە و لە شەڕی مریبا، لومانا و گەلی زاویتە بەشداری کردووە، ساڵی ١٩٦٢ لەگەڵ سەرۆک مستەفا بارزانی پەڕیوەتەوە بۆ دەڤەری سۆران و لە شەڕی چەککردنی قشڵەی ڕایات بەشداری کردووە، ساڵی ١٩٦٤ لە گوندی دێرێ و ساڵی ١٩٦٥ لە دیلمان پاسەوانی ماڵی سەرۆک مستەفا بارزانی بووە.
ساڵی ١٩٧٩ پەیوەندی بە هیزى پێشمەرگەى شۆڕشی گوڵان کردووە و گەڕاوەتەوە بۆ مەرگەوەڕی ڕۆژهەڵاتی کوردستان و کراوە بە پاسەوانی مەکتەبی سیاسی پارتی. لە ڕۆژی ١ی تەمووزی ١٩٨١دواى گواستنەوەى رۆفاتی سەرۆک مستەفا بارزانی لە شاری شنۆ بۆ گوندی هەلەج، پاسەوانی مەزاری بارزانی بووە. لەساڵی ١٩٨٧ لەگەڵ سەرۆک مەسعود بارزانی و بەشێک لە ئەندامانی مەکتەبی سیاسی پارتی هاتووەتە لقی یەک لە دەڤەری نێروە. ساڵی ١٩٨٨ گەڕاوەتەوە بۆ زێوە لە ڕۆژهەڵاتی کوردستان، دووبارە بەمەبەستی بەشداریکردن لەداستانی خواکوڕک، هاتۆتەوە بۆ دەڤەری خواکوڕک.
دوای شاڵاوە بەدناوەکەی ئەنفال و کیمیابارانکردنی دەڤەری بادینان لەساڵی ١٩٨٨، ناوبراو گەڕاوەتەوە بۆ زێوە لە ڕۆژهەڵاتی کوردستان، ساڵی ١٩٩١ گەڕاوەتەوە باشوورى کوردستان. خالید حەمید ئاغا بیری لە ژیانی پێشمەرگایەتیدا لە شەڕەکانی ماخوبزن، کەوپەڕ لە ڕۆژهەڵاتی کوردستان بریندار بووە.
لە ١٦ی ئابی ١٩٩٦ یۆبیلی زێڕینی پارتی دیموکراتی کوردستان، بەهۆی خزمەتەکانى لەلایەن سەرۆک مەسعود بارزانی میدالیای بارزانی پێ بەخشراوە. لە ٣٠ی ئایاری ٢٠١٢ کۆچی دوایی کردووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
