شەهید حەیدەر عەلی ناسراوە بە حەیدەر خانی گەرمیان، لە ساڵی ١٩٣٢ لە گوندی مەحمود قاجاری سەربە قەزای خانەقین لە دایکبووە، گوندنشین بووە و سەرقاڵی کاری جوتیاری بووە، حەیدەر خانی گەرمیان خێزاندار بووە و خێزانی ناوی نەسرین موراد بووە و خاوەنی چوار کوڕ و سێ کچ بووە.
ساڵی ١٩٦٧ پەیوەندی بە شۆڕشی ئەیلوولەوە دەکات و دەبێتە پێشمەرگە لای ئەکبەر حەیدەر سورەمیری کە لەوکاتەدا سەربە هێزی خەباتی پارتی دیموکراتی کوردستان بووە. بەشداری داستانەکانی بەمۆ ساڵی ١٩٦٧، شەڕەکانی سنووری خانەقین، شەڕی شارباژێر ساڵی ١٩٦٩ کردووە، لە ساڵی ١٩٦٧ لە داستانی چیای بەمۆ فیشەکی سەربازی ئەوکاتی عێراقی بەرکەوتووە و بریندار بووە. لە دوای نسکۆی شۆڕشی ئەیلوول و لە ساڵی ١٩٧٥ ئاوارەی وڵاتی ئێران بووە و لە شارۆچکەی ڕەوانسەری سەربە پارێزگای کرماشان نیشتەجێ بووە.
حەیدەر خانی گەرمیان لە شۆڕشی گوڵاندا درێژەی بە پەیوەندیە چەکدارییەکەی داوە لەگەڵ هێزەکانی پارتی دیموکراتی کورستان و لەوکاتەدا سەربە هێزی لێژنەی ناوچەی خانەقینی سەربە لقی سێی پارتی دیموکراتی کوردستان بوونە و ئەکبەر حەیدەر سورەمیری بەرپرسی لێژنە ناوچە بووە.
لە ساڵی ١٩٧٨ لە شەڕی شارباژێر فیشەکی سەربازی ڕژێمی ئەوکاتی عێراقی بەرکەوتووە و بە سەختی بریندار بووە، بۆ چارەسەر کردن ڕەوانەی نەخۆشخانەی شاری تارانی وڵاتی ئێران کراوە.
لە ساڵی ١٩٧٩ بۆتە ئەندامی گۆنگرەی نۆیەمی پارتی دیموکراتی کوردستان لە وڵاتی ئێران و دوای کۆنگرە ڕاستەوخۆ پلەی کارگێڕی لێژنەی ناوچەی خانەقینی وەرگرتووە.
لە ٢٦ی تەموزی ١٩٨١ لەگەڵ دەستەییەکی دە کەسی هاوسەنگەری لەسەر سنووری نێوان ئێران و عێراق مینی چێندراوی ڕژێمی بەعسیان پێدا تەقیوەتەوە و حەیدەر خانی گەرمیان شەهید بووە، دواتر لەلایەن هاوسەنگەرەکانیەوە جەستەکەی گوازراوەتەوە بۆ کرماشان و لە گۆڕستانی حەسەن ئاوای نێوان کرماشان و ڕەوانسەر بە خاکیان سپاردووە. هاوکات لەگەڵ حەیدەر خانی گەرمیان دوو هاوسەنگەری بەناوەکانی عەریف قادر و عەباس گەرمیانی شەهید بوونە و ئەکبەر حەیدەر سورەمیری، مەلا عەزیز گەرمیانی، جبار حەیدەر سورەمیری بە سەختی بریندار بوونە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
