شەهید جەعفەر ئیبراهیم لە ساڵی ١٩٦٦ لە گوندی سۆفی ئیبراهیمی سەربە ناحیەی قوشتەپەی پارێزگای هەولێر لە دایکبووە، گوندنشین بووە و سەرقاڵی کاری جوتیاری و ئاژەڵداری بووە، تا قۆناغى سەرەتایی خوێندووە.
شەهید جەعفەر ئیبراهیم کادری ڕێکخستنە نهێنیەکانی پارتی دیموکراتی کوردستان بووە لە شۆڕشی گوڵان، لە ساڵی ١٩٨٥ بۆتە کادیر لە بەشی دارایی و ژمێریاری تیپی شەهید کاروان مەنتک سەربە لقی دووی پارتی دیموکراتی کوردستان، سنووری کارو چاڵاکیشى لە گوندەکانی چواردەوری هەولێر بووە و ئەرکی گەیاندنی پەیامی شۆڕش و کۆکردنەوەی داهات و پێویستیەکانی هێزی پێشمەرگە بووە، هەروەها بەشداری دوو چالاکی پارتیزانی شانبەشانی هێزی پێشمەرگە لە ناو ناحیەی پردێ کردووە.
ساڵی ١٩٨٧ دوای گەیاندنی پێداویستی بۆهاوسەنگەرانی هەروەها ئەنجامدانی کۆبوونەوە و وەرگرتنی ڕێنمایی شۆڕش، لە کاتی گەڕانەوەی لە سنووری گوندی کانی بزری ناحیەی قوشتەپە، بەهۆى بۆردومانى فڕۆکەى حکومەتى عێراق لە دەڤەرەکە، جەعفەر ئیبراهیم شەهید بووە.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
