شەهید ڕەسوڵ حسێن لە ساڵی ١٩٥٤ لە گوندی ڕۆستێی سەربە ناحیەی گەڵاڵەی قەزای چۆمانی پارێزگاى هەولێر لە دایکبووە و سەرقاڵی کاری ئاژەڵداری گەڕۆک بووە، تا قۆناغى سەرەتایی خوێندووە.
ڕەسوڵ حسێن لە ساڵی ١٩٨٢ لەلایەن هێزێکی نەیاری پارتی دیموکراتی کوردستانەوە دەستبەسەر کراوە و لە بەرامبەر ٢٠ هەزار دیناری ئەوکاتی عێراق و ژمارەیەکی زۆر سەر مەڕ ئازادکراوە، هەردوای ئازادبوونی ڕووی کردۆتە وڵاتی ئێران و لە شاری خانی بۆتە پێشمەرگەی لێژنەی ناوچەی باڵەکی سەربە لقی دووی پارتی دیموکراتی کوردستان، کە لەوکاتەدا عەبدولڕەحمان مەلا ڕەسوڵ بەرپرسی سیاسی و نەجمەدین گۆرۆنى بەرپرسی سەربازی لێژنە ناوچە بوونە.
ڕەسوڵ حسێن بەشداری کارای هەبووە لە چالاکییە پارتیزانیەکانی دۆڵی ڕۆستێ، دۆڵی بالیسان، چوار دەوری سرێشمە، هەروەها لە شەڕەکانی بەرامبەر نەیارانی پارتی دیموکراتی کوردستان لە ناو خاکی وڵاتی عێراق و ئێران بەشداری کارای هەبووە کە دیارترینیان شەڕەکانی دۆڵی زێوێ و مەرگە بووە. لە ساڵی ١٩٨٣ لە شەڕی نەیارانی پارتی لە قەراتوکەی گوندی شێخ وەسانی دۆڵی خۆشناوەتی بە سەختی بریندار بووە و چەند فیشەکێک بەر قاچی چەپی کەوتووە.
لە ساڵی ١٩٨٥ پلەی فەرماندەی مەفرەزەی وەرگرتووە کە هەر سەربە لێژنە ناوچەی باڵەک بووە. لە ساڵی ١٩٩٠ دوای ئەنجامدانی چەند چالاکییەک لە دەڤەری خۆشناوەتی و گەڕانەوەی بەرەو وڵاتی ئێران لە بناری چیای هەڵگورد ڕەسوڵ حسێن کەوتۆتە بۆسەی سەرباز و جاشی ڕژێمی بەعس و شەهید بووە.
سەرچاوە:
١- ئەرشیفى دەستەى ئینسکلۆپیدیای پارتى دیموکراتى کوردستان.
