ژیاننامە
ئەحمەد جەرجیس حەسەن محەمەد لە ساڵی ١٩٤١ لە گوندی جوجەلی گچکەی سەربە قەزای بەردەڕەش لە دایکبووە. دانیشتوی شاری هەولێر بووە و سەرقاڵی کەسابەتی ناو بازاڕی هەولێر بووە، خێزاندار بووە و خێزانی ناوی زوڵێخا ڕەمەزانە و خاوەنی یەک کوڕە بووە بەناوی عەبدوڵا.
خەباتنامە
شەهید ئەحمەد جەرجیس لە ساڵی ١٩٦٣ بۆتە ئەندام لە شانەی نهێنی سەید ئەحمەد باداوان، کە سەر بە فارس باوە فەرماندەی بەتالیۆنی دەشتی هەولێری پارتی دیموکراتی کوردستان بووە، ئەم شانەیە ئەرکیان کاری ڕێکخستن و کۆکردنەوەی زانیاری لەسەر دوژمن و ئەنجامدانی چالاکی چەکداری بووە لە ناو شاری هەولێر، هەروەها ئەم شانەیە پێکهاتووە لە ١١ ئەندام بەناوەکانی سەید ئەحمەد بەرپرسی شانە، سەید قادر، ئەحمەد جەرجیس، سەید شوکری، سەید دارا، محەمەد سلۆ، عەلی عومەر، سەید هاشم، سەید جاسم، عەبدوڵا و ساڵح.
دوای هەڵگەڕانەوەی جەلال تاڵەبانی و جەلالیەکان لە شۆڕشی ئەیلوول و بوون بە جاشی ڕژێمی ئەوکاتی عێراق، لەلایەن جەلالیە جاشەکانەوە پلانی شەهیدکردنی کادرانی پارتی دیموکراتی کوردستان لە ناو شاری هەولێر دادەنرێت. لە یەکەم کاریاندا لە ساڵی ١٩٦٦ لە گەڕەکی تەیراوەی شاری هەولێر سەید جاسمیان شەهید کردووە. دوای بڵاو بوونەوەی ئەم هەواڵە ئەحمەد جەرجیس و چەند ئەندامێکی شانەکەیان هەر ئەو ڕۆژە هەولێر بەجێ دەهێڵن و پەیوەندی دەکەن بە فارس باوە فەرماندەی بەتالیۆن و بوونەتە پێشمەرگە.
لە دوای دامەزراندنی هێزی دەشتی هەولێر لە ساڵی ١٩٦٧ شەهید ئەحمەد جەرجیس پلەی سەرپەلی لە لقی یەکی بەتالیۆنی سێی هێزی دەشتی هەولێر وەرگرتووە، کە لەوکاتەدا مەلا عومەر محێدین پلەی سەرلقی یەک و شەهید ئەحمەد حاجی پلەی فەرماندەی بەتالیۆنی سێیان وەرگرتووە.
لە ساڵی ١٩٦٩ لە شەڕی خڕە و هەرشەم لە دەڤەری سورچیان، کە ڕووبەڕووی سەرباز و جاشی ڕژێمی ئەوکاتی عێراق بوونەوە، ئەحمەد جەرجیس فیشەک بەر سینگی کەوتووە و بەسەختی بریندار بووە، هاوسەنگەرانی هەوڵیان داوە بیگوازنەوە بۆ وەرگرتنی چارەسەر، بەڵام کە گەشتوونەتە نزیک گوندی ڕەزگە ئەحمەد جەرجیس بەهۆی سەختی برینەکەیەوە شەهید بووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
