ئەبوبەکر مەحمود حەمەشەریف، ساڵی ١٩٤٣ لە گوندی بانی بنۆکی بناری چیای سورێنی سەربە ناحیەی خورماڵ لە دایکبووە، گوندنشین بووە و تا قۆناغی سەرەتایی خوێندووە، لە دوای نسکۆی شۆڕشی ئەیلوول ئاوارەی وڵاتی ئێران بووە و لە شاری مەریوان نیشتەجێ بووە، خێزاندار بووە و خێزانی ناوی کافیە محەمەد بووە و هاوشانی خۆی لە چیاکان پێشمەرگە بووە و دوای شەهیدبوونی ئەبوبەکر زیاتر بەشداری چالاکی کردووە و لە ٢٠ی تشرینی یهكهم ١٩٨٦ کافیە و دەستەیەک هاوسەنگەری بۆ چالاکی پارتیزانی ویستوویانە بچنە سەیدسادق، بەڵام لە دەرەی سوری ئەحمەد ئاوا کەوتوونەتە بۆسەی سەربازی ڕژێمی بەعس و کافیە و هاوسەنگەرێکی بەناوی محەمەد فەرەج شەهید بوونە و ئەنوەری حاجی عوسمان بە سەختی بریندار بووە، خاوەنی چوار کوڕ و یەك كچ بووە بە ناوەکانی فازڵ، قادر، شاخەوان، دڵشاد لە ئاوارەی وڵاتی ئێران کۆچی دوای کردووە و کچی چنور.
ساڵی ١٩٦٩ بۆتە پێشمەرگەی لێژنە ناوچەی دەربەندیخانی لقی چواری پارتی دیموکراتی کوردستان، کە لەوکاتەدا مەلا عومەری بانی بنۆکی برای بەرپرسی ناوچەکە بووە، ساڵی ١٩٧٤ لە شۆڕشی ئەیلوول بەشداری چهندین شهڕی كردووه، لهوانه شەڕی سەرتیز، شەڕی دەربەندیخان، شەڕی چیای زمناکۆی کردووە، ساڵی ١٩٧٤ پلەی جێگری سەرلقی ٤ی بەتالیۆنی بەمۆی سەربە هێزی خەباتی پارتی دیموکراتی کوردستانی وەرگرتووە، کە لەوکاتەدا ئەحمەد چەقژی سەرلقی بووە و حەمەسور حسێن فەرماندەی بەتالیۆنی بووە.
ساڵی ١٩٧٥ لە دوای نسکۆی شۆڕشی ئەیلوول هاوشانی بنەماڵەکەی دەستبەرداری چەک نەبووە و لەسەر سنوور درێژەیان بە خەباتی کوردایەتی داوە، لە شۆڕشی گوڵان بەشداری چالاکییە پارتیزانییەکانی دەشتی شارەزوور، چاڵاکی پارتیزانی ناو شاری سلێمانی، شەڕی شارباژێر، شەڕی گوندی کۆڵیتە، شەڕی گوندی قاینێجەی شارەزوور، شەڕەکانی هەڵەبجە و کۆمەڵێک داستان و نەبەردی تر کردووە.
ساڵی ١٩٧٩ لەگەڵ دەستەیەک هاوسەنگەری چونەتە ناو شاری سلێمانی بۆ چالاکییەکی گرنگی پارتیزانی، دوای ئەنجامدانی چالاکییەکە و گەڕانەوەیان لە نزیک گوندی قەویلەی دەشتی شارەزوور کەوتوونەتە بۆسەی ژمارەیەکی زۆری سەرباز و جاشی ڕژێمی بەعس، لە ئەنجامدا چەند هاوسەنگەرێکی شەهید بوونە و ئەبوبەکر مەحمود حەمەشەریف و عوسمان بانیشاری بە سەختی بریندار بوونەوە بە برینداری خۆیان دەرباز کردووە.
ساڵی ١٩٧٩ پلەی فەرماندەی بەتالیۆنی هێزی سورێنی پارتی دیموکراتی کوردستانی وەرگرتووە، ساڵی ١٩٨٠ پلەی ئەندامی لێژنە ناوچەی دەربەندیخانی سەربە لقی چواری پارتی دیموکراتی کوردستانی وەرگرتووە.
ساڵی ١٩٨١ هێزێکی زۆری سەرباز و جاشی ڕژێمی بەعس هێرشێکی فراوانیان کردۆتە سەر سەنگەرەکانی پێشمەرگە لەسەر سنووری ئێران و کانی خەیاران و دۆڵەناو، لە ئەنجامی ڕووبەڕووبوونەوە ئەبوبەکر مەحمود بە سەختی بریندار بووە، بەڵام سەنگەرەکەی داگیر نەکراوە و هێزەکەی بەعس کشاونەتەوە، دواتر فرۆکەکانی ڕژێم بە چەکی ٦٠تیر بۆردومانی سەنگەرەکەیان کردووە و ئەبوبەکر مەحمود حەمەشەریف بە برینداری چەند فیشەکێکی ٦٠ تیری بەرکەوتووە و شەهید بووە، دواتر هاوسەنگەرانی جەستەکەی دەگوازنەوە شاری مەریوانی وڵاتی ئێران و لە گۆرستانی داسێوان لە تەنیشت گۆڕی دڵشادی کوڕی بە خاکیان سپاردووە.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
