شەهید ئازاد حەمەعەلی، ساڵی ١٩٦٨ لە گوندی سەرگەڵوی سەربە ناحیەی سورداشی قەزای دووکان پارێزگاى سلێمانى لە دایکبووە، گوندنشین و سەرقاڵی کاری جوتیاری و ئاژەڵداری بووە، تا قۆناغى سەرەتایی خوێندووە، سەڵت بووە. ساڵی ١٩٨٥ پەیوەندی بە هێزى پێشمەرگەى شۆڕشی گوڵان کردووە و لە ڕێکخراوی خورماڵی سەربە لێژنە ناوچەی هەڵەبجەی لقی چواری پارتی دیموکراتی کوردستان بۆتە پێشمەرگە. ئەوکات نازم خورماڵی بەرپرسی ڕێکخراو و فەرماندەی مەفرەزەی خورماڵ بووە. لە شۆڕشی گوڵاندا بەشداری شەڕی خۆرنەوازان، شەڕی ئەحمەد ئاوا، شەڕی بنکەی پۆلیسی خورماڵ، شەڕە پارتیزانیەکانی دەشتی شارەزوور و شەڕی سەربازگەی بانی شار کردووە.
لە ١٠ی ئایاری ١٩٨٧ ئازاد و هاوسەنگەرانی هێرشیان کردووە بۆ گرتنەوەی سەربازگەی سەربازی سوپاى عێراق لە گوندی بانی شاری نێوان خورماڵ و ئەحمەد ئاوا، هەر لە گەیشتنیان بۆ یەکەم سەنگەری سەربازانی بەعس، ئازاد حەمەعەلی مینی چێندراوی پێدا تەقیوەتەوە و بە سەختی بریندار بووە، هاوسەنگەرانی بۆ وەرگرتنی چارەسەر دەیگوازنەوە وڵاتی ئێران و لە سەر سنوور لە دەربەند دزڵی ئازاد حەمەعەلی بە هۆی سەختی برینەکەیەوە شەهید بووە و هاوسەنگەرانی لە گۆڕستانی دزڵی بە خاکیان سپاردووە.
سەرچاوە:
١-ئەرشیفی دەستەى ئینسکلۆپیدیاى پارتى دیموکراتى کوردستان.
